Abadepite bemeje itegeko ryemerera UK kohereza abimukira mu Rwanda

  • SHEMA IVAN
  • Gashyantare 28, 2024
  • Hashize amezi 2
Image

Kuri uyu wa Gatatu tariki ya 28 Gashyantare, Inteko Rusange y’Umutwe w’Abadepite yemeje umushinga w’itegeko ryemera kwemeza burundu amasezerano hagati ya Guverinoma y’u Rwanda n’u Bwongereza ku by’ubufatanye mu kurengera impunzi n’abimukira binjira muri iki gihugu bitemewe n’amategeko.

Ayo masezerano avuguruye yashyiriweho umukono i Kigali mu Rwanda, ku wa 05 Ukuboza 2023.

Hari hashize iminsi icyumweru Inteko rusange y’Umutwe w’Abadepite wemeje inshingiro ry’umushinga w’itegeko ryemerera u Bwongereza kohereza abimukira mu Rwanda.

Icyo gihe abadepite 62 bitabiriye imirimo y’inteko rusange, abafashe ijambo 99% bagaragaje ko bashyigikiye uyu mushinga, ndetse 58 batora ishingiro ryawo, babiri batora ’Oya’ habonekamo imfabusa ebyiri.

Minisitiri w’Ubutabera Dr. Ugirashebuja Emmanuel, yagaragarije Abadepite ko ikibazo cy’abimukira gihangayikishije Isi, ndetse ngo buri gihugu gikwiye gufata iya mbere mu gutanga umusanzu mu kugikemura.

Yavuze ko amateka y’igihugu, ubumuntu no kuba Abanyarwanda benshi baragizweho ingaruka n’ubuhunzi ku buryo u Rwanda rwumva vuba kuba igisubizo ku bantu bari muri iki kibazo, bitandukanye no kuba hashakwa inyungu zitandukanye.

Ati: “Amafaranga ntabwo ariyo dushyira imbere, icya mbere ni ukureba ko ibihugu byombi [u Rwanda ni rwo mvugira] ko twaba igisubizo mu kibazo dufite cyugarije Isi cy’abimukira, aya mafaranga naza gusa kugira ngo babeho neza hakurikijwe uburenganzira bwa muntu n’icyubahiro umuntu agomba kuba afite.”

Kwemeza uyu mushinga w’itegeko wemerera burundu u Bwongereza kohereza abimukira mu Rwanda mu Nteko Inshinga Amategeko y’u Rwanda uje ukirikira icyemezo Inteko ishinga Amategeko y’u Bwongereza umutwe w’Abadepite, nawo wemeje umushinga wa Minisitiri w’Intebe, Rishi Sunak, wo kohereza mu Rwanda abimukira basabaga ubuhungiro ku wa 18 Mutarama 2024,

Uyu mushinga wemejwe ku bwiganze bw’amajwi 320 bawushyigikiye kuri 276 batoye ko batabishyigikiye.

Minisiteri y’Ubutegetsi bw’Igihugu y’u Bwongereza muri Mutarama yatangaje ko Guverinoma yiteguye kohereza by’agateganyo abimukira ba mbere bagera ku 33,085 mu mpera za Werurwe 2024.

Perezida Kagame ubwo yari i Davos mu Busuwisi, yabajijwe n’Umunyamakuru niba abona gahunda yo kohereza abimukira mu Rwanda izakunda, yavuze ko  ikibazo cy’abimukira kireba cyane u Bwongereza kurusha u Rwanda.

Perezida Kagame yemeje ko amafaranga u Rwanda rwahawe n’u Bwongereza muri iyi gahunda azakoreshwa kuri aba bimukira kandi ko bataje u Rwanda rushobora kuyasubiza.

Abasesengura amategeko Mpuzamahanga bavuga ko icyemezo u Rwanda rwafashe cyo kwakira abimukira bazoherezwa n’u Bwongereza kigaragaza agaciro u Rwanda ruha ikiremwamuntu.

Tariki 14 Mata 2022 ni bwo u Rwanda n’u Bwongereza bashyize umukono ku masezerano ya mbere y’ubufatanye mu iterambere no kwakira abimukira bajya mu Bwongereza mu buryo butemewe.

Kuri uwo munsi Guverinoma y’u Bwongereza yavuze ko aya masezerano ari umushinga ibihugu byombi byagiyeho inama mu gihe cy’amezi 9, bemeje ko nta guhubuka cyangwa kwibeshya kwabayeho.

Minisitiri w’Ububanyi n’Amahanga w’u Rwanda, Dr. Vincent Biruta yavuze ko kwakira impunzi n’abimukira bifite umuzi ku mateka y’u Rwanda.

Uyu mushinga uteganya ko u Bwongereza buha u Rwanda amapawundi miliyoni 290, ni ukuvuga amafaranga y’u Rwanda arenga miliyari 450.4 kugira ngo rujye rwakira by’agateganyo abafatiwe muri icyo gihugu mu gihe ubusabe bwabo bukirimo kwigwaho.

  • SHEMA IVAN
  • Gashyantare 28, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE