UEFA Champions League: Hamenyekanye uko amakipe azahura muri ¼

Tombola igaragaza uko amakipe azahura muri ¼ ku makipe yahize andi i Burayi (UEFA Champions League) yasize Arsenal yo mu Bwongereza itomboye Bayern Munchen yo mu Budage naho Real Madrid yo muri Espagne itombora Manchetser City yo mu Bwongereza.

Ku gicamunsi cyo kuri uyu wa Gatanu tariki 15 Werurwe 2024, ni bwo mu Mujyi wa Nyon mu Busuwisi, habaye tombola y’uko amakipe umunani yageze muri ¼ agomba kuzisobanura.

Iyi tombola yasize imikino ibiri ikomeye cyane, aho ku ikubitiro Arsenal yo mu Bwongereza yaherukuga muri iki cyiciro muri 2010 yatomboye Bayern Munchen yakunze kuyitsinda cyane muri iyi mikino.

Manchester City ifite igikombe giheruka yatomboye Real Madrid ifite igikombe cya 2022, undi mukino utegerejwe ni uwo Paris Saint Germain yo mu Bufaransa izakiramo FC Barcelona yo muri Espagne.

Ni mu gihe Atletico Madrid yo muri Espagne yatomboye Borussia Dortmund. 

Imikino ibanza izaba tariki 09-10 Mata 2024 mu gihe iyo kwishyura ari hagati y’itariki 16-17 Mata 2024.

Hahise hanakorwa uko aya makipe azahura mu mikino ya ½, aho ikipe izakomeza hagati ya Arsenal na Bayern Munchen izahura n’izava hagati ya Manchester City na Real Madrid.

Indi izava hagati ya Atletico Madrid na Dortmund izahura n’izakomeza hagati ya Paris Saint Germain na FC Barcelona.