Abadepite batatu batavuga rumwe n’ubutegetsi bwa Senegali batawe muri yombi nyuma yo kugaragaza ko batishimiye imyanzuro yafashwe n’Inteko Ishinga Amategeko yo kudindiza amatora.
Abo badepite batawe muri yombi n’inzego z’umutekano ku wa Kabiri nubwo ubuyobozi bwa Senegal nta kintu burabivugaho.
Inteko Ishinga Amategeko ya Senegal yateranye ku ya 05 Mutarama yemeje ko amatora ya perezida azatinda akageza ku ya 15 Ukuboza, biteza impagarara mu badepite batavuga rumwe n’ubutegetsi bituma bavanwa mu cyumba cy’inteko igitaraganya.
Reuters yatangaje ko abadepite 105 mu 165, bari mu cyumba cy’inteko batoye bashyigikiye iki cyemezo kidindiza amatora, kugeza mu Kuboza aho Mack Sall azaguma ku buyobozi kugeza abonye umusimbura.
Umwe mu badepite batawe muri yombi ubwo bari mu Nteko Ishinga Amategeko yagize ati: “Baturage ba Senegal mufite abanzi b’igihugu imbere yanyu bafata imyanzuro ipfuye batitaye ku byo bari gukora, ibi ni ugupfobya Itegeko Nshinga”.
Umuvugizi w’ishyaka ritavuga rumwe n’ubutegetsi Pastef ryasheshwe, El Malick Ndiaye, yavuze ko Abadepite batatu bo mu ihuriro ry’abatavuga rumwe n’ubutegetsi batawe muri yombi ku wa kabiri, ndetse ko n’uwahoze ari umuyobozi wa polisi yafunzwe.
Abaturage ba Senegal bamaze iminsi mu myigaragambyo nyuma y’uko ku wa Gatandatu Perezida Mack Sall atangaje ko amatora y’Umukuru w’Igihugu yari ateganyijwe ku ya 25 Gashyantare asubitswe.
Nta gitekerezo kiratangwa. Ba uwa mbere gutanga igitekerezo.
Andika igitekerezo
AMATEGEKO AGENGA IYANDIKA RY'IGITEKEREZO CYAWE