Handball: Ikipe y’u Rwanda iri mu itsinda A hamwe na Croatia izakira igikombe cy’Isi

Kuva taliki 2 kugeza 13 Kanama 2023 muri Croatia hazabera imikino y’igikombe cy’Isi mu batarengeje imyaka 19 mu bahungu ku nshuro ya 10  “IHF Men’s Youth World Championship 2023”.

Ku wa  Gatanu taliki 03 Werurwe 2023 ni bwo mu Mujyi wa Zagreb muri Croatia habereye tombola y’uko amakipe azahura mu matsinda.

Kugeza ubu hari amakipe 31 ariko imikino izitabirwa n’amakipe 32 ari na bwo bwa mbere hitabiriye amakipe menshi.  Ikipe imwe isigaye izaboneka nyuma y’irushanwa mpuzamigabane “IHF Inter-Continental Trophy 2023” rizabera San José muri Costa Rica kuva taliki 07 kugeza 11 Werurwe 2023.

Nyuma y’ iyi tombola, ikipe y’u Rwanda yisanze mu itsinda rya mbere hamwe na Croatia izakira irushanwa, Portugal na Algeria.

Umutoza mukuru w’ikipe y’u Rwanda U-19,  Bagirishya Anaclet yatangaje ko iri tsinda barimo ritoroshye ariko bagiye kwitegura ku buryo bazagenda bakitwara neza baharanira gusohoka mu itsinda.

Agaruka kuri aya makipe bazahura, yavuze ko Portugal ari ikipe  ikomeye ndetse na Croatia  izaba iri mu rugo ariko Algeria bazahangana kuko no kubona itike y’igikombe cy’Isi ari yo bakinnye mu mikino y’Afurika yabereye mu Rwanda bakanganya.

Ati: “Ni itsinda rikomeye ariko rikinika, tugiye  kwitegura  kandi tuzagenda duhangane kuko turifuza kuzasohoka mu itsinda”.

Uko andi amatsinda ateye

Itsinda B: Hungary, Slovenia, Morocco na New Zealand.

Itsinda C: Egypt, Iceland, Japan na Czech Republic.

Itsinda D: Spain, Republic of Korea, Brazil na  Bahrain.

Itsinda E: Denmark, Austria, Chile na Mexico.

Itsinda F: Norway, Montenegro, North Macedonia  n’ikipe izegukana “IHF Inter Continental Trophy 2023”.

Itsinda G: Germany, Argentina, Saudi Arabia na USA.

Itsinda H: Sweden, Faroe Islands, Islamic Republic of Iran n’u Burundi.

Iyi mikino yaherukaga kuba muri 2019  kuko muri 2021 itabaye kubera COVID-19. Muri 2019, ikipe ya Misiri ni yo yegukanye igikombe itsinze  u Budage ibitego 32 kuri 28.

Andi makipe yari ahagarariye  Afurika, Tunisia yasoreje ku mwanya wa 16, Nigeria isoreza ku mwanya wa 23.