Cricket: Challengers CC yegukanye irushanwa “Dafabet RCA T10 Cup 2022”

Ishyirahamwe ry’umukino wa Cricket mu Rwanda “RCA”  ku bufatanye na “Dafabet”, kompanyi yo mu Buhinde ikora ibijyanye no gutega ku mikino hateguwe irushanwa ryahuje amakipe y’icyiciro cya mbere mu bagabo “Dafabet RCA T10 Cup 2022” ahakinwe udupira 60 (10 Overs).

Iri rushanwa ryabereye kuri Sitade Mpuzamahanga ya Gahanga ryahuje amakipe 6  ryatangiye taliki 8 Ukwakira  risozwa 13 Ugushyingo 2022 aho ikipe ya Challengers CC yegukanye igikombe itsinze ku mukino wa nyuma ikipe ya Telugu Royals CC ku kinyuranyo cy’amanota 72 (135-63). 

Mbere yo gusoza iri rushanwa taliki 12 Ugushyingo 2022 habaye imikino isoza amajonjora aho Challengers CC yatsinze Spartans CC, Telugu Royals CC itsinda Kutchi Tigers CC naho Zonic Tigers CC itsinda Kigali CC.

Nyuma y’iyi mikino, ikipe ya Challengers CC yasoje iyoboye urutonde n’amanota 8 inganya na Telugu Royals CC  yasoreje ku mwanya wa kabiri na Zonic Tigers CC yasoreje ku  mwanya wa 3. Ikipe ya Challengers CC na Telugu Royals CC ni zo zakinnye  umukino wa nyuma.

Kuri uyu mukino wa nyuma wabaye taliki 13 Ugushyingo 2022, ikipe ya Challengers CC yatangiye ikubita agapira ishaka amanota “Batting” maze  mu dupira 60 (10 Overs) ikora amanota 135 mu gihe abakinnyi 2 ari bo basohowe mu kibuga (2 Wickets).

Ikipe ya Telugu Royals CC yasabwaga amanota 136 yatangiye gukubita agapira ishaka amanota “Batting” maze mu dupira 60 (Overs) ikora amanota 63 mu gihe abakinnyi 5 ari bo basohowe mu kibuga (5 Wickets).

Ikipe ya Challengers CC yahise yegukana igikombe ku kinyuranyo cy’amanota 72.

Uko amakipe yakurikiranye

Ikipe ya Challengers CC yegukanye umwanya wa mbere ikurikirwa na Telugu Royals CC (2), Zonic Tigers CC (3), Kigali CC (4), Spartans CC (5) na Kutchi Tigers CC (6)

Iri ryari irushanwa rya kabiri ryatewe inkunga na “Dafabet” kuko kuva taliki 28 Kanama  kugeza  2 Ukwakira 2022 habaye irushanwa “Dafabet RCA T20 League 2022” ryahuje amakipe yo mu cyiciro cya mbere mu bagabo aho bakinnye udupira 120 ( 20 Overs). Ikipe ya Zonic Tigers CC ni yo yegukanye igikombe itsinze ku mukino wa nyuma Kigali CC ku kinyuranyo cy’amanota 58.