Zonic Tigers CC 164-106 Kigali CC
Ikipe ya Zonic Tigers CC ni yo yegukanye igikombe cy’irushanwa “Dafabet RCA T20 League 2022” itsinze ku mukino wa nyuma ikipe ya Kigali CC ku kinyuranyo cy’amanota 58.
Uyu mukino wabereye kuri Sitade mpuzamahanga ya Gahanga ku Cyumweru taliki 02 Ukwakira 2022.
Muri uyu mukino wa nyuma muri iri rushanwa ryahuzaga amakipe yo mu cyiciro cya mbere mu bagabo, ikipe ya Zonic Tigers CC ni yo yabanje gukubita agapira ishaka amanota “Batting” maze mu dupira 120 (20 Overs) ikora amanota 164 mu gihe abakinnyi 6 basohowe mu kibuga (6 Wickets).
Ikipe ya Kigali CC yasabwaga amanota 165 ngo yegukane intsinzi yatangiye na yo gukubita agapira ishaka amanota “Batting” ubwo hari hamaze gukinwa udupira 116 (19.2 Overs), abakinnyi 10 basohowe mu kibuga ( 10 Wickets) mu gihe yari imaze gukora amanota 106.
Ikipe ya Zonic Tigers CC yahise yegukana intsinzi ku kinyuranyo cy’amanota 58.
Umukinnyi Niyitanga Willison ukinira ikipe ya Zonic Tigers CC ni we witwaye neza muri uyu mukino aho yatsinze amanota 88 mu dupira 67 yakinnye.
Ikipe ya Zonic Tigers CC nyuma yo kwitwara neza yahawe igikombe ndetse na miliyoni 1 y’amafaranga y’u Rwanda. Ikipe ya Kigali CC yabaye iya kabiri yahawe ibihumbi 500.
Umukinnyi witwaye neza mu irushanwa ryoshe “MVP” yabaye Hamza Khan ukinira ikipe ya Kigali CC aho yahawe ibihumbi 200. Uyu mukinnyi kandi ni we wabaye uwakubise agapira neza kurusha abandi “Best Batter”.
Mu bandi bahembwe harimo Akayezu Martin ukinira Zonic Tigers CC wabaye umukinnyi wahize abandi mu gutera agapira « Best bowler” naho Uwimana David aba umukinnyi wakinnye neza mu kibuga hagati “Best Fielder”.
Nyuma yo kwegukana igikombe, Perezida wa Zonic Tigers CC, Eddie Balaba yatagaje ko bishimye cyane avuga ko impamvu bitwaye neza ari uko bafashe igihe cyo gutegura abana b’Abanyarwanda kandi bakiri bato.
Akomeza avuga ko kwegukana iki gikombe bibahaye imbaraga zo gukomeza gukora birushijeho.
Perezida w’ishyirahamwe ry’umukino wa Cricket mu Rwanda “RAC”, Musaale Stephen yishimiye uko iri rushanwa ryagenze neza kandi ko kuba iri ryari rifite umuterankunga byongereye uguhangana.
Akomeza avuga ko nyuma y’iri rushanwa hari irindi riteganyijwe ariko bakazajya bakina udupira 60 ( 10 Overs).
Iri rushanwa “Dafabet RCA T20 League 2022” ryatangiye taliki 28 Kanama 2022 aho ryateguwe n’ishyirahamwe ry’umukino wa Cricket mu Rwanda “RCA” ku bufatanye n’abaterankunga barimo Dafabet, kompanyi yo mu Buhinde ikora ibijyanye no gutega ku mikino ndetse na Simba Voyages Ltd ikora ibijyanye n’ingendo zo mu kirere.
Uko amakipe yakurikiranye
Ikipe ya mbere yabaye Zonic Tigers CC, Kigali CC (2), Challengers CC (3), Kutchi Tigers CC (4), Telugu Royals CC (5) na Spartans CC (6).
