Minisitiri w’Ibidukikije Dr. Arakwiye yatorewe kuyobora MOP 38

Minisitiri w’Ibidukikije w’u Rwanda Dr. Arakwiye Bernadette, yatorewe kuyobora Inama ya 38 y’Ihuriro ry’Ibihugu byasinye amasezerano ya Montréal, amasezerano agamije gufata neza, no kurengera akayunguruzo k’imirasire y’izuba.

Minisiteri y’Ibidukikije yashimangiye ko itorwa rya Dr. Arakwiye Bernadette ari intambwe nziza ku Gihugu ku byerekeranye n’ubuyobozi bwiza bw’u Rwanda by’umwihariko mu birebana no guteza imbere ibikorwa bifitanye isano no kubungabunga ibidukikije.

Dr. Arakwiye yatorewe mu nama ya MOP38   yatangiye kubera i Kigali kuva ku wa 2 kugeza ku wa 6 Ugushyingo 2026, akaba ari inama mpuzamahanga ihuje ibihugu byashyize umukono ku Masezerano ya Montréal, n’ivugururwa ryayo ryemejwe i Kigali mu mwaka  wa  2016.

Minisitiri Dr. Arakwiye yahawe kuyobora ibiganiro byibanda ku gusuzuma intambwe ibihugu bitandukanye bimaze gutera mu gushyira mu bikorwa amasezerano agamije kurengera akayunguruzo k’imirasire y’izuba, hagamijwe gusuzuma ibyagezweho ndetse n’ibikwiye kongerwamo ingufu.

Ibyo biganiro yayoboye, byibanze ku gushimangira ubufatanye mpuzamahanga no guteza imbere ingamba zihuriweho zerekeranye no kurengera akayunguruzo k’imirasire y’izuba, mu gihe Isi ikomeje gushakira ibisubizo ibibazo bishingiye ku ngaruka, z’imihindagurikire y’ibihe.

Amasezerano ya Montréal yashyizweho mu 1987 agamije kugabanya no gukuraho ikoreshwa ry’imyuka n’ibindi binyabutabire byangiza akayunguruzo k’imirasire y’izuba, karinda ibinyabuzima.

Mu 2016, i Kigali na bwo habereye ivugururwa ry’ayo masezerano ryibanze ku kugabanya ikoreshwa ry’imyuka ya Hydrofluorocarbons (HFCs), ikoreshwa cyane mu bikoresho bikonjesha gusa ikagira uruhare mu kongera ikibazo cy’ubushyuhe kumugabane w’Isi.

Iyo nama ya MOP38 ibereye Ikigali mu gihe hashize imyaka igera ku 10 u Rwanda rwakiriye ibiganiro byageze kuntambwe yo kwemeza iri vugururwa, bikaba ari n’umwanya wo kongera gusuzuma uruhare rw’ibihugu mu gushyira mu bikorwa gahunda zo kurengera ikirere.

 Ibyo wamenya kuri Dr. Arakwiye Bernadette 

Dr. Arakwiye Bernadette yize muri Kaminuza Nkuru y’ u Rwanda aho yavanye impamyabumenyi y’icyiciro cya kabiri cya kaminuza mu binyabuzima, yongeye kubona impamyabumenyi y’Icyiciro cya Gatatu cya Kaminuza mu bidukikije muri kaminuza ya Antiock. Yakomeje amashuri abona Impamyabumenyi y’Ikirenga mu bumenyi bw’Isi ayikuye muri Kaminuza ya Clark muri Massachusetts muri Leta Zunze Ubumwe za Amerika.

Nyuma yo kwiga muri Amerika no mu Bwongerezayakoze ibikorwa bitandukanye by’ubushakashatsi mu bigo mpuzamahanga bikora ibyerekeranye n’ibidukikije ndetse n’ubumenyi bw‘Isi.

Mbere yo kuba Minisitiri w’Ibidukikije Dr. Arakwiye Bernadette yari Umuyobozi Mukuru wa World Resources Institute (WRI) ayoboye porogaramu yo gusana ubutaka (Land Restauration) ku mugabane wa Afurika.

Yanabaye Umuyobozi w’Inama y’Ubutegetsi yari ishinzwe kwiga kuri Porogaramu yo kubungabunga ubutaka muri Afurika, naho mbere y‘aho yari umushakashatsi mu kigo cya Conservation International muri Amerika. Ikindi kandi yabaye Umushakashatsi wungirije mu Kigo cya Dian Fossey Gorilla Funds mu Rwanda, inshingano nshya ku mwanya wa Minisiiri akaba yarazihawe ku ya 24 Nyakanga 2025 asimbuye Dr. Uwamariya Valantine.