Real Madrid yatsinze FC Barcelone, Kilyan Mbappé yandika amateka

Rutahizamu Kylian Mbappé yanditse amateka yo kuba umukinnyi wa 24 umaze gutsinda ibitego 100 mu ikipe ya Real Madrid. Ni nyuma yo kuyifasha gutsinda FC Barcelone ibitego 2-1, mu mukino w’Umunsi wa 10 wa shampiyona ya Espagne, La Liga.

Uyu mukino ufatwa nk’uwa mbere ku Isi, wabaye mu ijoro ryo ku Cyumweru, tariki 25 Ukwakira 2026, Spotify Camp Nou muri uyu mwaka w’imikino wa 2026/27.

Wari umukino ukomeye hagati y’impande zombi kuko Barcelone yifuzaga gutsinda ikongera ikinyuranyo kiri hagati yayo na Real Madrid kikagera ku manota icyenda, mu gihe intsinzi ya Real Madrid yari kugabanya ikinyuranyo kikagera kuri atatu.

Real Madrid yakinnye uyu mukino idafite umunyezamu wayo wa mbere Thibaut Courtois wagaragaje ibimenyetso by’uburwayi bw’ibicurane.

Ni umukino watangiye wihuta ku mpande zombi, buri kipe igererageza kurema uburyo bwo gutsinda igitego hakiri kare.

Mu minota 20, Real Madrid yongereye imbaraga isatira izamu rya FC Barcelona harimo ishoti rikomeye ryatewe na Ardar Guler, umupira ukurwaho neza n’umunyezamu Joan Garcia.

Mu minota 30’ FC Barcelone yihariye umupira isatira cyane izamu rya Real Madrid, ariko uburyo abarimo Lamine Yamal na Raphinha babonye ntibabubyaza umusaruro.

Ku munota wa 41’ Real Madrid yafunguye amazamu ku mupira Yan Diomande yahinduye imbere y’izamu, ukurwaho nabi na myugariro Gerard Martin ugwa ku kirenge cya Kylian Mbappe ujya mu izamu. Igice cya mbere cyarangiye Real Madrid itsinze FC Barcelona igitego 1-0.

Mu igice cya kabiri, FC Barcelone yagarukanye imbaraga nyinshi isatira izamu rya Real Madrid ishaka igitego cyo kwishyura, ariko ubwugarizi n’umunyezamu wayo bakomeza guhagarara neza.

Byasabye gutegereza ku munota wa 61’ ubwo Raphinha yatsindiraga FC Barcelona igitego cyo kwishyura ku ishoti rikomeye yatereye mu rubuga rw’amahina, umupira uruhukira mu rushundura.

Mu minota 70’ amakipe yombi yagerageje kurema uburyo bwo gutsinda igitego, ariko akagorwa no kubyaza umusaruro amahirwe babonaga imbere y’izamu.

Ku munota wa 80, Umutoza wa Real Madrid Jose Mourinho yakoze impinduka Eduardo Camavinga asimbura Bernardo Silva.

Ku munota wa 87, izi mpinduka zatanze umusaruro binyuze ku mupira Eduardo Camavinga yahaye Kylian Mbappe ahita awushyira mu izamu atsindira Real Madrid igitego cya kabiri.

Umukino warangiye Real Madrid itsinze FC Barcelone ibitego 2-1, ihagarika urugendo rw’imyaka itatu yari imaze idatsindira kwa mukeba w’ibihe byose.

FC Barcelona yakomeje kwicara ku mwanya wa mbere n’amanota 27 irusha atatu Real Madrid iri ku mwanya wa gatatu.

Ibitego bibiri Kilyan Mbappé yatsinze muri uyu mukino byatumuye yuzuza ibitego 100 atsindiye Real Madrid kuva yayisinyira muri Nyakanga 2024.