U Rwanda rwitabiriye inama yiga uko imicungire y’amazi yakumira amakimbirane muri Afurika 

Minisitiri w’Ububanyi n’Amahanga n’Ubutwererane Amb. Olivier Jean Patrick Nduhungirehe, yitabiriye inama ya kane izwi nka “Luanda Biennale – Pan-African Forum for the Culture of Peace and Non-Violence”, yibanda ku gushimangira imiyoborere ibungabunga umutungo kamere w’amazi mu gukumira amakimbirane muri Afurika.

Iyi nama iba nyuma ya buri myaka ibiri, ihuriza hamwe Abanyafurika n’abandi bafatanyabikorwa mu guteza imbere umuco w’amahoro, gukumira ihohoterwa no gushakira umuti urambye amakimbirane binyuze mu biganiro, ubufatanye no gusangira umuco.

Muri uyu mwaka, iyo nama iteraniye i Luanda muri Angola guhera ku wa Kane tariki ya 22 kugeza kuri uyu wa 23 Ukwakira 2026.

Insanganyamatsiko y’uyu mwaka ni yo yibanze ku gushimangira imiyoborere y’amazi muri Afurika, hagamijwe kuyakoresha nk’igikoresho cyo gukumira amakimbirane no guhuza imbaraga mu kuyakemura.

Iyi nama iribanda kuri iyo ngingo mu gihe amazi ari umutungo kamere w’ingenzi mu mibereho y’abaturage ba Afurika binyuze mu iterambere ry’imibereho myiza, mu buhinzi, ubworozi, inganda n’iterambere ry’ubukungu. 

Abitabiriye iyo nama bazirikana ko iyo habayeho ibibazo by’isaranganywa ry’amazi cyangwa imiyoborere yayo idahwitse, bishobora guteza amakimbirane hagati y’abaturage, imiryango cyangwa ibihugu bisangiye amasoko y’amazi.

Iyi nama itegurwa ku bufatanye bwa Guverinoma ya Angola, Umuryango wa Afurika Yunze Ubumwe (AU) n’Ishami ry’Umuryango w’Abigumbye ryita ku Burezi, Ubumenyi na Siyansi n’Umuco (UNESCO).

Iya mbere yabaye mu mwaka wa 2019, iya kabiri iba mu 2021 mu gihe iya gatatu iheruka kuba mu 2023. 

Muri uyu mwaka, insanganyamatsiko irahuzwa n’Icyerekezo 2063 aho imwe mu ntego ari ukugeza ku baturage amazi meza ahagije mu buryo burambye no kunoza serivisi z’isuku n’isukura.

Mu byitezwe kuganirwaho harimo ubufatanye mu micungire y’amazi asangiwe n’ibihugu, uruhare rw’abaturage mu gufata ibyemezo, ingaruka z’imihindagurikire y’ibihe ku mazi n’ihindagurika ry’imiturire, gushora imari mu bikorwa remezo by’amazi no kongerera ubushobozi abayacunga.