RSSB Tigers yasoreje ku mwanya wa 4 mu mikino mpuzamigabane ya FIBA

Ikipe ya RSSB Tigers yari ihagarariye u Rwanda n’Umugabane wa Afurika yasoreje ku mwanya wa kane mu mikino y’irushanwa rihuza amakipe ahagarariye imigabane ku Isi rya ‘FIBA Intercontinental Cup 2026’, nyuma yo gutsindwa na Club Atletico Boca Juniors yo muri Argentine amanota 93-62.

Uyu mukino wo guhatanira umwanya wa gatatu wakinwe mu gitondo cyo kuri iki Cyumweru, tariki ya 27 Nzeri 2026, mu nzu y’imikino ya National Indoor Stadium iri mu Mujyi wa Beijing mu Bushinwa.

RSSB Tigers yawukinnye idafite umukinnyi w’imena wayo Craig Randall wagiriye ikibazo cy’imvune mu mukino wa kimwe cya kabiri (½)  batsinzwemo na NBA G League United yo muri Leta Zunze Ubumwe za Amerika. 

Ni umukino watangiye wihuta, amakipe yombi atsindana binyuze mu bakinnyi barimo Leonardo Lema na Axel Mpoyo. Agace ka mbere karangiye Club Atletico Boca Juniors iyoboye umukino n’amanota 26 kuri 18 ya RSSB Tigers.

Mu gace ka kabiri, iyi kipe yo muri Argentine yakomeje kongera amanota ibifashijwemo n’abarimo Agustin Barreiro watsindaga amanota yiganjemo atatu ndetse ikinyuranyo kigera muri 20 (38-18). 

Ku rundi ruhande, RSSB Tigers ntiyorohewe n’aka gace itakaza imipira myinshi (turn overs), bituma iyi kipe ikomeza kuzamura amanota.

Igice cya mbere cyarangiye Club Atletico Boca Juniors ikomeje kuyobora umukino n’amanota 52 kuri 29 ya RSSB Tigers.

Mu gace ka gatatu, umukino watangiye wegeranye amakipe yombi atsindana amanota yatsindwaga cyane n’abarimo Jose Vildoza na Ndayisaba Ndizeye Dieudonne.

Mu minota itatu ya nyuma, iyi kipe yo muri Argentine yakomeje kongera ikinyuranyo cy’amanota ibifashijwemo na Tomas Monacchi watsindaga cyane kigera muri 32 (74-42). 

Aka gace karangiye Club Atletico Boca Juniors igejeje ku manota 75 kuri 45 ya RSSB Tigers.

Mu gace ka kane, RSSB Tigers yagerageje kugaruka mu mukino, itsinda amanota 17, ariko Club Atletico Boca Juniors na yo ikomeza kongera ikinyuranyo, umukino urangira itsinze RSSB Tigers amanota 93-62, yegukana Umudali w’Umuringa mu gihe RSSB Tigers yasoreje ku mwanya wa kane mu mikino ya FIBA Continental Cup” irimo gukinwa ku nshuro ya 36.

Umukino wa nyuma urahuza NBA G League United yo muri Leta Zunze Ubumwe za Amerika na Rytas Vilnius yo muri Lithuania guhera saa sita n’igice.