Ibyaha by’ihohoterwa bikorerwa ku mubiri byagabanyutseho 33,7% kubera guca ‘Ibyuma’

Polisi y’u Rwanda yagaragaje ko umubare w’ibyaha bijyanye n’ihohoterwa rikorerwa ku mubiri byagaragajwe wagabanyutseho 33,7% hagati ya Nyakanga na Kanama, mu gihe inzego zishinzwe umutekano zakomeje ibikorwa byo guhangana n’inzoga zitemewe zizwi nk’Ibyima.

Imibare ya Polisi y’u Rwanda igaragaza ko mu mpera za Nyakanga 2026 hari hamaze kugaragara ibyaha 652 by’ihohoterwa rikorerwa ku mubiri.

Mu mpera za Kanama, uwo mubare wari umaze kugera kuri 432, bivuze ko hagabanutse ibyaha 220.

Iri gabanyuka ryabaye mu gihe inzego z’ubutabera n’iz’umutekano zakajije ibikorwa byo kurwanya inzoga zitemewe, nyuma y’uko hagaragajwe impungenge ku ngaruka zazo ku buzima, umutekano w’abaturage n’ibindi bibazo by’imibereho.

Ibikorwa byo kurwanya inzoga zitemewe byakajijwe guhera mu mpera za Nyakanga no mu ntangiriro za Kanama, nyuma y’uko hakomeje kugaragazwa ingaruka z’ubuzima n’imibereho ziterwa no kunywa ibinyobwa bitujuje ubuziranenge.

Ku wa 4 Kanama, Urwego rw’Ubugenzacyaha (RIB) rwatangaje ko mu byumweru bibiri byari byabanjirije uwo munsi, inzego z’ubuyobozi zari zimaze kugenzura ahakorerwa inzoga 246, zifunga inganda zigera kuri 110 ndetse zifata abantu 56 bakekwaho kugira uruhare mu bikorwa by’inzoga zitemewe.

Ibicuruzwa bifite agaciro karenga miliyari 2,6 Frw na byo byari byaramaze gufatwa, mu gihe hatanzwe amande agera kuri miliyoni 360 Frw.

Ibikorwa byo kugenzura no gufunga abakora ibyo bikorwa bitewe mu buryo butemewe byakomeje, aho RIB yatangaje ko kuva ku wa 2 Kanama, ibigo birenga 140 byari bimaze gufungwa, ndetse hanibutswa ko amoko menshi y’inzoga yakuwe ku isoko.

Nyuma yaho, RIB yatangaje ko abantu 104 bakekwaho kugira uruhare mu gukwirakwiza inzoga zitemewe bari bamaze gufatwa, mu gihe dosiye 97 zari zashyikirijwe Ubushinjacyaha guhera ku wa 20 Nyakanga.

Leta kandi yagaragaje ko kunywa inzoga nyinshi bifitanye isano n’ibindi bibazo byugarije imibereho y’abaturage. 

Muri Nyakanga, Minisitiri w’Ubutegetsi bw’Igihugu, Dominique Habimana, yavuze ko kunywa inzoga nyinshi bigira uruhare mu makimbirane yo mu miryango, abana bava mu ishuri, ubushomeri n’ibindi bibazo bigira ingaruka ku miryango n’urubyiruko.

Ibi bikorwa byo guhangana n’inzoga zitemewe byaje bikurikiye raporo zagaragazaga ingaruka zikomeye ku buzima. 

Abashinzwe ubuzima batangaje ko kuva mu ntangiriro za 2026, abantu barenga 50 bari bamaze gupfa, abarenga 100 barahuma kubera inzoga, mu gihe abarenga 500 bari bamaze kwivuza nyuma yo kunywa inzoga zitemewe.