Ikorwa rya Prince House-Cyamitsingi: Abakoresha umuhanda beretswe inzira zindi

Abatwara ibinyabiziga n’abagenzi bakoresha umuhanda Prince House–Cyamitsingi basabwe gukoresha inzira zindi mu gihe hatangiye imirimo yo kuwagura, mu rwego rwo kwirinda umuvundo no koroshya urujya n’uruza rw’ibinyabiziga.

Uyu muhanda uri mu gice cya mbere cy’umushinga wo kwagura umuhanda Prince House-Giporoso-Masaka. Imirimo yo kwagura umuhanda Prince House-Cyamitsingi iteganyijwe gutangira kuri uyu wa Mbere, tariki ya 31 Kanama 2026.

Polisi y’u Rwanda yatangaje ko abagenzi bava Rwandex berekeza i Kabuga bazajya bakoresha inzira ya Sonatube-Alpha Palace-Kabeza-Giporoso-Corridor-Kanombe-Kunyange-Kabuga.

Hari kandi indi nzira ishobora gukoreshwa inyura Kabeza-Busanza-Kuri Segiteri i Kanombe-Ku Nyange-Kabuga.

Abagenzi bava Kacyiru berekeza i Kabuga basabwe gukoresha inzira ya Gisimenti–Kwa Rwamahama–Kumushumbamwiza–Mulindi–Kabuga, ndetse n’indi mihanda ihuza iyo nzira.

Amakamyo yo yasabwe gukoresha umuhanda wa Kabuga–Special Economic Zone–Zindiro–Masizi–Birembo–Gasanze–Nyacyonga–Nyabugogo.

Amakamyo ava ku mupaka wa Rusumo yerekeza i Kigali azajya akoresha umuhanda Ngoma–Bugesera–Kigali.

Polisi n’izindi nzego bireba basabye abakoresha imihanda gukurikiza inzira zagenwe n’amabwiriza y’umutekano wo mu muhanda mu gihe imirimo yo kwagura uyu muhanda izaba ikomeje.

Abatwara ibinyabiziga kandi basabwe gutegura ingendo zabo hakiri kare no gukurikiza amabwiriza bahabwa n’abapolisi bashinzwe umutekano wo mu muhanda, kugira ngo hirindwe ubucucike kandi urujya n’uruza rw’ibinyabiziga rukomeze kugenda neza.

Uyu mushinga ukorwa ku bufatanye bwa Guverinoma y’u Rwanda na Guverinoma ya Repubulika y’Abaturage y’u Bushinwa, mu rwego rwo guteza imbere ibikorwa remezo by’ubwikorezi no gushyigikira iterambere ry’ubukungu rirambye.

Ikigo gishinzwe Iterambere ry’Ubwikorezi mu Rwanda (RTDA) cyatangaje ko imirimo y’uyu mushinga iteganyijwe kumara amezi 30, ikaba yatangiye guhera ku itariki ya 30 Kanama 2026.

Umushinga wo kwagura uyu muhanda ufite uburebure bwa kilometero 10, aho biteganyijwe ko nurangira, uzoroshya ingendo n’itumanaho hagati y’ibice bitandukanye, ukongera umutekano wo mu muhanda n’ubushobozi bwo gutwara abantu n’ibintu, ndetse ukorohereze urujya n’uruza rw’abantu n’ibicuruzwa kuri uyu muhanda ukoreshwa n’abantu benshi.