Rayon Sports WFC yisanze mu Itsinda A mu gushaka itike ya CAF Women’s Champions League

Ikipe ya Rayon Sports WFC ihagarariye u Rwanda yisanze mu Itsinda A hamwe na Yei Joint Stars yo muri Sudani y’Epfo, Mafunzo WFC yo muri Zanzibar na Denden FC yo muri Eritrea, mu mikino ya CECAFA yo gushaka itike ya CAF Women’s Champions League.

Mu kwezi gutaha hagati y’itariki ya 21 kugeza ku wa 31 Kanama 2026, i Kigali hazabera imikino ihuza amakipe yitwaye neza muri Afurika y’Iburasirazuba n’iyo Hagati (CECAFA).

Amakipe 10 arimo na Rayon Sports WFC ihagarariye u Rwanda, ni yo azitabira iri rushanwa ritanga itike yo kujya mu matsinda ya CAF Women’s Champions League, akaba agabanyije mu matsinda atatu.

Tombola yabereye kuri Stade Amahoro kuri uyu wa Kane, yasize Rayon Sport yisanze mu Itsinda A hamwe na na Yei Joint Stars yo muri Sudani y’Epfo, Mafunzo WFC yo muri Zanzibar na Denden FC yo muri Eritrea.

Amakipe ari mu Itsinda B ni Commerical Bank of Ethiopia, Kawempe Muslim Ladies yo muri Uganda na FC Ujeco yo muri Djibouti.

Ni mu gihe Itsinda C rigizwe na Simba Queens yo muri Tanzania, Kenya Police FC yo muri Kenya na Top Girls Academy y’i Burundi.

Ikipe za mbere muri buri tsinda zizabona itike ya 1/2 mu gihe indi kipe izakina iki cyiciro ari izaba yitwaye neza mu makipe yabaye aya kabiri.

JKT Queens yo muri Tanzania ni yo yegukanye Igikombe cya CECAFA giheruka, itsinze Rayon Sports y’Abagore igitego 1-0. Ikipe izacyegukana muri uyu mwaka ni yo izahita ibona itike yo kuzitabira CAF Women Champions League ihagarariye CECAFA.