Umukinnyi w’ikipe y’u Rwanda mu mukino w’amagare, Habimana Jean Eric yegukanye isiganwa ry’umunsi umwe “Grand Prix Fitness Park 2022” muri Martinique.
Iri siganwa ryabaye taliki 18 Kamena 2022 ryari yateguwe n’ishyirahamwe ry’umukino w’amagare muri Martinique ku bufanye n’abakunzi b’uyu mukino bo mu gace ka “Saint-Etienne”.
Mu cyiciro cy’abakuru “Men Elite” hitabiriye abakinnyi 80 baturutse mu makipe 18 aho bazengurutse intera ya kilometero 108 . Habimana Jean Eric ukinira Team Pédale Pilotine- Blue Car yegukanye umwanya wa mbere aho yakoresheje amasaha 2, iminota 40 n’amasegonda 52. Ku mwanya wa kabiri haje mugenzi we Areruya Joseph na we ukinira Team Pédale Pilotine- Blue Car aho yakoresheje amasaha 2, iminota 41 n’amasegonda 10 naho ku mwanya wa 3 haza Axel Carnier ukinira ikipe ya Pédale d’or Joséphine.
Umukinnyi wa mbere yahembwe amayero 300, uwa kabiri ahabwa 250 na ho uwa gatatu ahabwa 200.
Iri siganwa rikaba ryari mu rwego rwo gufasha abakinnyi mu cyiciro cy’abakuru kwitegura irushanwa rikomeye mpuzamahanga rizabera muri Martinique “Tour International de Martinique 2022” kuva taliki 09 kugeza 17 Nyakanga 2022.
Mu ngimbi “Juniors”, Timothée Joisin (Team Pédale Pilotine- Blue Car) yegukanye umwanya wa mbere akurikirwa na Axel Zaméo (Madinina Bikers) naho ku mwanya wa 3 haza Anthony Rosélie (JC 231).
Mu batarengeje imyaka 23 «Espoirs » , Habimana Jean Eric (Team Pédale Pilotine- Blue Car) yaje ku mwanya wa mbere akurikirwa na Jules Chatelon (Madinina Bikers) naho Jacques Dylan (Etoile Cycliste Lamentinoise) asoreza ku mwanya wa 3.
Abakanyujijeho bagera kuri 22 na bo bitabiriye iri siganwa aho bakoze intera ya kilometero 10 maze Jules Joseph Auguste yegukana umwanya wa mbere.
Habimana na Areruya bamaze gukina amasiganwa ane
Kuva taliki 16 Gicurasi 2022, Habimana Jean Eric na Areruya Joseph bari muri Martinique aho basinye amasezerano y’amezi 3 muri Team Pédale Pilotine- Blue Car ashobora kongerwa.
Iyi kipe ikaba yaraciyemo abakinnyi bakomeye bakomoka muri Eritrea barimo Daniel Teklehaimanot wegukanye Tour du Rwanda na shampiyona y’Afurika muri 2010 ndetse na Tesfom Okubamariam wegukanye shampiyona y’Afurika muri 2013 na 2016.
Nyuma yo kugera muri iyi kipe, Habimana Jean Eric na Areruya Joseph bamaze gukina amasiganwa 4 ari yo “Grand Prix 22 Mai”, isiganwa ryabaye taliki 19 kugeza 22 Gicurasi 2022 , « Grand Prix du développement durable et solidaire » ryabaye taliki 26 kugeza 29 Gicurasi 2022 aya akaba yarabereye muri Martinique.
Nyuma y’aya masiganwa yombi, aba bakinnyi bitabiriye isiganwa “Grand Prix Boris Carene 2022” ryabereye muri Guadeloupe kuva taliki 02 kugeza 09 Kamena 2022 nyuma bitabira na “Grand Prix Fitness Park 2022”, isiganwa ryabaye taliki 18 Kamena 2022.
Mu mpera z’iki cyumweru taliki 25 na 26 Kamena 2022, Habimana na Areruya bazakina isiganwa rya gatanu “Memorial Fred Culé 2022”.
