Abakobwa
Rwanda 52-43 Uganda
Abahungu
Tanzania 61-48 Uganda
Taliki 18-06-2022
Abakobwa
Tanzania-Uganda (16h00)
Abahungu
Tanzania-Rwanda (19h00)
Ikipe y’u Rwanda y’abakobwa batarengeje imyaka 18 mu mukino wa Basketball, yitwaye neza itsinda Uganda amanota 52 kuri 43, mu mukino wa nyuma ku Rwanda mu mikino y’Akarere ka 5 “FIBA Zone 5 U-18 Afrobasket Preliminaries 2022” irimo kubera i Kampala muri Uganda kuva taliki 12 kugeza 18 Kamena 2022.
Muri uyu mukino wabaye ku wa Gatanu taliki 17 Kamena 2022, iyi kipe y’u Rwanda yabonye intsinzi yayo ya mbere, yatangiye neza kuko yatsinze agace ka mbere ku manota 17-7 ndetse n’agace ka kabiri kuri 14-5.
Yagarutse mu gace ka 3 na ko igatwara ku manota 15-12 itakaza aka nyuma ka 4, ku manota 19 kuri 6 gusa yegukana umukino ku kinyuranyo cy’amanota 9 (52-43).
Ikipe y’u Rwanda yasoje ibonye intsinzi imwe mu mikino 4 yakinnye, bisobanuye ko itabashije kubona itike y’imikino ya nyuma y’igikombe cy’Afurika “U-18 AfroBasket”, izabera i Antananarivo muri Madagascar kuva taliki 23 Nyakanga kugeza ku ya 1 Kanama 2022.
Mu wundi mukino wabaye mu bahungu, ikipe ya Tanzania yatsinze Uganda amanota, 61 kuri 48.
Uko ikipe y’u Rwanda mu bakobwa yitwaye
Ikipe y’u Rwanda y’abakobwa batarengeje imyaka 18, itozwa n’umutoza Muhirwa Rukundo Jean Claude yatangiye itsindwa na Tanzania ku manota 50-40, itsindwa na Uganda ku manota 71-50, ni mu gihe yatsinzwe na Tanzania bigoranye kuko hitabajwe iminota y’inyongera ku manota 86-79.
Imikino y’Akarere ka 5 irasozwa uyu munsi
Kuri uyu wa Gatandatu, taliki 18 Kamena 2022, iri rushanwa ry’Akarere ka 5, rikaba rikomeza hakinwa imikino isoza, aho mu bahungu ikipe y’u Rwanda yamaze gukatisha itike y’igikombe cy’Afurika, ihura na Tanzania (19h00) naho mu bakobwa, Tanzania ikine na Uganda (16h00). Izi kipe zombi zinganya amanota (5), zikaba zigomba kwishakamo izahagararira aka karere mu mikino y’Afurika.
Kugeza ubu, u Rwanda ruri ku mwanya wa mbere n’amanota 6 kuri 6, Uganda iza ku mwanya wa kabiri n’amanota 5 mu mikino 4, naho Tanzania ni iya 3 n’amanota 4 mu mikino 3.
Mu bakobwa, Tanzania na Uganda ziranganya amanota 5 mu mikino 3 zimaze gukina, ziyanganya kandi n’ikipe y’u Rwanda iri ku mwanya wa 3 n’amanota 5 mu mikino 4.
