Police FC 0-2 APR FC
Kiyovu 2-0 Marines FC
Musanze FC 0-1 Rutsiro FC
AS Kigali 2-0 Etoile de l’Est FC
Ikipe ya APR FC nyuma yo gutsinda Police FC mu mukino w’umunsi wa nyuma wa shampiyona y’u Rwanda y’icyiciro cya mbere mu bagabo mu mupira w’amaguru « Rwanda Primus National League 2021-2022 » yahise yegukana igikombe ku nshuro ya 20.
Uyu mukino w’umunsi wa 30 wabereye kuri Sitade ya Kigali i Nyamirambo, ikipe ya APR FC yatsinze Police FC ibitego 2-0 byatsinzwe na Mugisha Gilbert ku munota wa 52 n’uwa 2 w’inyongera.
Kuri Sitade ya Muhanga naho habereye umukino wa Kiyovu na Marines FC aho Kiyovu nayo yari ifite amahirwe yo kwegukana igikombe mu gihe APR FC yanganyije cyangwa igatsindwa. Uyu mukino nawo warangiye Kiyovu itsinze Marines FC ibitego 2-0 byatsizwe na Bigirimana Abedi ku munota wa 47 na Emmanuel Okwi ku munota wa 85.
Ikipe ya APR FC yasoje shampiyona ya 2021-2022 ku mwanya wa mbere n’amanota 66 mu gihe Kiyovu yasoreje ku mwanya wa kabiri n’amanota 65. Iyi kipe ya APR FC yashyikirijwe igikombe ndetse na sheki ya miliyoni 25 z’amafaranga y’u Rwanda.
Nyuma yo kwegukana iki gikombe, APR FC yahise yuzuza ibikombe 20 bya shampiyona y’u Rwanda imaze kwegukana (1995, 1996, 1999, 2000, 2001, 2003, 2005, 2006, 2006-2007, 2008-2009, 2009-2010, 2010-2011, 2011-2012, 2013-2014, 2014-2015, 2015-2016, 2017-2018, 2019-2020 , 2020-2021 na 2021-2022).
Iyi kipe ya APR FC ikaba yahise ibona itike yo kuzahagararira u Rwanda mu mikino y’Afurika y’amakipe yabaye aya mbere iwayo « Total CAF Champions League 2022-2023 ».
Indi mikino y’umunsi wa 30 yabaye, ikipe ya Rutsiro FC yatsinze Musanze FC igitego 1-0 naho AS Kigali itsinda Etoile de l’Est FC ibitego 2-0. Ibi byatumye ikipe ya Etoile de l’Est isoreza ku mwanya wa 15 n’amanota 28 aho yo na Gicumbi FC iri ku mwanya wa 16 n’amanota 18 zamanutse mu cyiciro cya kabiri.
Kuri uyu wa Gatanu taliki 17 Kamena 2022, haraba indi mikino aho Gasogi United ikina na Rayon Sports i Nyamirambo (15h00) naho Etincelles FC yakire Mukura i Rubavu (15h00). Imikino ya shampiyona ya 2021-2022 izasozwa taliki 18 Kamena 2022 aho Gorilla FC izakira Espoir FC i Nyamirambo (15h00) naho Gicumbi FC yakire Bugesera FC i Gicumbi (15h00).
Foto: Renzaho C.
