Rwanda 93-91 Botswana
Uganda 213-46 Germany
Nigeria 62-63 Tanzania
Kenya 184-82 Brazil
Taliki 16-06-2022
Botswana-Uganda (Gahanga-9h30)
Rwanda-Nigeria (IPRC Kigali-09h30)
Germany-Kenya (Gahanga-13h30)
Brazil-Tanzania(IPRC Kigali-13h30)
Ikipe y’u Rwanda yitwaye neza itsinda umukino wa 3 muri 6 imaze gukina mu irushanwa mpuzamahanga ryo Kwibuka “Kwibuka Women’s T20I Tournament 2022” .
Muri uyu mukino w’umunsi wa 7, wabereye kuri Sitade mpuzamahanga ya Gahanga taliki 15 Kamena 2022, ikipe ya Botswana ni yo yatangiye ikubita agapira ishaka amanota “Batting” maze mu dupira 120 (20 Overs ) ikora amanota 91, abakinnyi bayo 7 basohorwa mu kibuga (7 Wickets).
Ikipe y’u Rwanda yasabwaga amanota 92 yatangiye gukubita agapira ishaka amanota “Batting” maze mu dupira 100 (16.4 Overs) ikora amanota 93 mu gihe abakinnyi 4 ari bo bari basohowe mu kibuga (4 Wickets).
Ishimwe Gisele ukinira ikipe y’u Rwanda ni we wabaye umukinnyi witwaye neza muri uyu mukino aho yakinnye iminota 52 atsinda amanota 26 anakura abakinnyi babiri ba Botswana mu kibuga.
Ikipe ya Uganda yatsinze ikipe y’igihugu y’u Budage, umukino wabereye muri IPRC Kigali. Ikipe ya Uganda ni yo yabanje gukubita agapira ishaka amanota “Batting” maze mu dupira 120 ( 20 Overs) ikora amanota 213 aho umukinnyi umwe ari we wasohowe mu kibuga (1 Wicket).
Ikipe y’u Budage yasabwaga amanota 214 yatangiye gukubita agapira ishaka amanota “Batting”, ubwo yari imaze gukora amanota 46 mu dupira 113 (18.5 Overs) abakinnyi bose bahise basohorwa mu kibuga (10 Wickets). Ikipe ya Uganda yegukana intsinzi ku kinyuranyo cy’amanota 167.
Sarah Akiteng ukinira Uganda ni we watowe nk’umukinnyi witwaye neza muri uyu mukino aho yakuye mu kibuga abakinnyi 4, mugenzi we, Kevin Awino atsinda amanota menshi (95).
Ikipe ya Tanzania ihabwa amahirwe yo gusoreza ku mwanya wa mbere yitwaye neza mu mukino w’umunsi wa 7 itsinda ikipe y’igihugu ya Nigeria.
Uyu mukino wabereye kuri Sitade mpuzamahanga ya Gahanga ukurikiranwa na Ambasaderi wa Tanzania mu Rwanda, Maj. Gen. Richard Mutayoba Makanzo.
Muri uyu mukino, ikipe ya Nigeria ni yo yabanje gukubita agapira ishaka amanota “Batting”, mu dupira 119 (19.5 Overs) yakoze amanota 62, abakinnyi bose basohorwa mu kibuga (10 Wickets).
Ikipe ya Tanzania yasabwaga amanota 63 yatangiye gukubita agapira “Batting” maze mu dupira 74 (12.2 Overs) ikora amanota 63 mu gihe abakinnyi 3 ari bo basohowe mu kibuga.
Umukinnyi Tabu Omary waTanzania ni we witwaye neza muri uyu mukino aho yakuye mu kibuga abakinnyi babiri ba Nigeria.
Undi mukino w’umunsi wa 7 wabereye muri IPRC Kigali aho ikipe ya Kenya yatsinze Brazil. Ikipe ya Kenya yabanje gukubita agapira ishaka amanota maze mu dupira 120 ( 20 Overs) itsinda amanota 184, abakinnyi 3 bava mu kibuga.
Ikipe ya Brazil yasabwaga amanota 185 yatangiye gukubita agapira ishaka amanota “Batting” maze mu dupira 111 (18.3 overs) itsinda amanota 82 mu gihe abakinnyi bose basohowe mu kibuga (10 Wickets). Ikipe ya Kenya yahise yegukana intsinzi ku kinyuranyo cy’amanota 103.
Sarah Wetoto ukinira ikipe y’igihugu ya Kenya ni we mukinnyi witwaye neza muri uyu mukino.
Kugeza ubu, Tanzania irayoboye n’amanota 12, ikurikiwe na Kenya n’amanota 10, Uganda ku mwanya wa 3 n’amanota 8, ikipe y’u Rwanda ku mwanya wa 4 n’amanota 6 inganya na Nigeria iri ku mwanya wa 5. Ikipe ya Brazil iri ku mwanya wa 6 n’amanota 4, Botswana ku mwanya wa 7 n’amanota 2 mu gihe ikipe y’u Budage iri ku mwanya wa nyuma wa 8 aho nta nota na rimwe ifite.
Harasozwa imikino y’amajonjora
Kuri uyu wa Kane taliki 16 Kamena 2022 harakinwa imikino y’umunsi wa 8 ari yo isoza imikino y’amajonjora aho ikipe ya Botswana ikina na Uganda i Gahanga (9h30), ikipe y’u Rwanda ikine na Nigeria muri IPRC Kigali (09h30). Ikipe ya Kenya irakina n’u Budage i Gahanga (13h30) naho Brazil ikine na Tanzania muri IPRC Kigali (13h30).
