APR BBC yasubiriye REG BBC ikomeza urugendo rwo kudatsindwa muri Shampiyona

APR BBC yasubiriye REG BBC iyitsinda amanota 69-62 mu mukino wo kwishyura wa Shampiyona, yuzuza itsinzi ya 14 yikurikiranya muri Shampiyona y’uyu mwaka itaratakazamo inota.

Uyu mukino w’ishiraniro wari utegerejwe na benshi, wabaye mu ijoro ryo ku wa Gatanu, tariki ya 4 Mata 2025 muri Petit Stade i Remera.

APR BBC yagiye gukina uyu mukino ishaka gukomeza guca agahigo ko kudatsindwa mu gihe REG BBC yashakaga gushimangira umwanya wa kabiri.

Ikipe ya REG BBC ni yo yatangiye umukino iri hejuru cyane abakinnyi nka Prince Muhizi na Jean Jacques Boissy bayitsindira amanota menshi.

Ku rundi ruhande APR BBC nayo yatsindaga amanota binyuze mu bakinnyi nka Robbeyns Williams, Nshobozwabyosenumukiza Jean Jacques Wilson.

Agace ka mbere karangiye REG BBC iyoboye n’amanota 16-10 ya APR BBC.

Mu gace ka kabiri, APR BBC yagarukanye imbaraga itangira kongera amanota abakinnyi nka Axel Mpoyo, Alioum Diarra na Robbeyns Williams batsinda cyane ndetse iyobora umukino.

Igice cya mbere cyarangiye APR BBC iyoboye umukino n’amanota 30 kuri 24 y’ikipe ya REG BBC.

Mu gace ka gatatu, umukino wakomeje kuryoha cyane ari nako amakipe yombi yongera amanota.

Mu minota itanu ya nyuma y’aka gace APR BBC yarushaga cyane REG BBC yakomeje kongera ikinyuranyo cy’amanota binyuze mu bakinnyi nka Jordan McRae, Alioum Diarra na Justin Uwitonze.

Aka gace karangiye ifite amanota 47 Kuri 35 ya REG BBC.

APR BBC yakomerejeho mu gace ka nyuma ibifashijwemo n’abakinnyi barimo Justin Uwitonze, Axel Mpoyo na Alioum Diarra ikomeza kongera ikinyuranyo.

Mu minota ya nyuma y’umukino, REG BBC yagarutse mu mukino itangira kugabanya ikinyuranyo abakinnyi barimo Prince Muhizi na Jean Jacques Boissy batsinda.

Umukino warangiye APR BBC yatsinze REG BBC amanota 69-62 ikomeza umuhigo wo kudatsindwa muri Shampiyona y’uyu mwaka, mu mikino 14 imaze gukina.

Muri uyu mukino Muhizi Prince wa REG BBC ni we watsinze amanota menshi (20).

Umukino wabanjirije uyu, Tigers BBC yatsinze Orion BBC amanota 80-70.

Imikino ya Shampiyona irakomeza kuri uyu wa Gatandatu tariki ya 5 Mata 2025.

UBG BBC irakina na Azomco saa Cyenda, Kepler BBC irakina na Orion BBC saa kumi n’imwe n’igice mu gihe Patriots BBC ikina  na Espoir BBC saa mbiri z’ijoro, imikino yose irabera kuri Petit Stade i Remera.