Al Ahly na Al Hilal: Ibyavuye muri tombola ya ¼ cya CAF Champions League

Impuzamashyirahamwe y’Umupira w’Amaguru muri Afurika (CAF) yakoresheje tombola y’uburyo amakipe azahura muri ¼, aho Al Ahly yo mu Misiri ifite igikombe giheruka na Al Hilal SC yo muri Sudani. 

Ni mu gikorwa cyabaye kuri uyu wa Kane, tariki ya 20 Gashyantare 2025, i Doha muri Qatar nyuma yo gusoza imikino y’amatsinda.

Al Ahly FC yo mu Misiri, yegukanye irushanwa riheruka ikaba ku nshuro ya 12 ni yo yahereweho tombola nyuma yo gusoza imikino y’amatsinda iri ku mwanya wa kabiri ihita ihura Al Hilal SC yo muri Sudani.

Andi makipe yari muri iyi tombora ni Pyramids FC yo mu Misiri izahura na AS FAR yo muri Maroc, Mamelodi Sundowns F.C. yo muri Afurika y’Epfo yatomboye Espérance Sportive de Tunis yo muri Tunisia mu gihe MC Alger yo muri Algeria izahura na Orlando Pirates yo muri Afurika y’Epfo.

Iyi mikino y’iri rushanwa riri gukinwa ku nshuro ya 61 izatangira tariki ya 1 Mata kugeza 2, mu gihe iyo kwishyura izaba hagati ya tariki 8 kugeza 9 Mata 2025.

Muri ½ ikipe ikomeza hagati ya Al Ahly na Al Hilal SC izahura ni izatsinda hagati ya Mamelodi Sundowns F.C. na Espérance Sportive de Tunis

Naho, ikipe izakomeza hagati ya MC Alger na Orlando Pirates izahura ni izava hagati ya Pyramids FC na AS FAR.

Mu mwaka ushize wa 2024, iri rushanwa ryegukanywe na Al Ahly yo mu Misiri nyuma gutsinda Espérance Sportive de Tunis igitego 1-0 mu mikino yombi.