Neymar yatandukanye na Al-Hilal

Ikipe ya Al-Hilal yo mu Cyiciro cya Mbere muri Arabie Saoudite, yatangaje ko yasheshe ku bwumvikane amasezerano yari ifitanye n’Umunya-Brésil Neymar.

Ku mugoroba wo ku wa Mbere tariki 27 Mutarama 2025 ni bwo ikipe yashyize hanze itangazo yemeza ko bamaze gutandukana.

Neymar w’imyaka 32, yageze muri Al-Hilal muri Kanama 2023 kuri miliyoni 90 y’ama Euro, ariko yayikiniye imikino irindwi gusa kubera imvune.

Uyu mukinnyi wahenze mu mateka y’umupira w’amaguru ku Isi ubwo yagurwaga miliyoni 200 z’ama Euro yerekeza muri Paris Saint-Germain mu 2017, yari amaze gukina imikino ibiri gusa muri uyu mwaka w’imikino, aho uwa nyuma ari uwo yasimbuyemo mu Ugushyingo.

Ibitanganzamakuru bitandukanye bivuga ko ashobora kwerekeza mu Ikipe ya Santos yakuriyemo y’iwabo muri Brésil.

Neymar yari asigaje amezi arindwi ku masezerano, aho yari yasinye imyaka ibiri muri Al-Hilal byavugwaga ko imuhemba miliyoni 150 z’ama Euro ku mwaka.

Mu Ukwakira 2023 mu mukino wo gushaka itike y’Igikombe cy’Isi wahuje Brésil na Uruguay ni bwo yagize Imvune yashyize iherezo ku nzozi ze zo “kwandika amateka mashya.

Uyu mukinnyi yasubiye mu kibuga mu Ukwakira 2024, azakongera kuvunika mu mukino we wa kabiri ndetse kuva icyo gihe ntiyongeye kugaragara akina.

Neymar yakuriye muri Santos yatsindiye ibitego 136 mu mikino 225 mbere yo kugurwa na FC Barcelone mu 2013.

Mu myaka ine yakinnye muri Espagne, yagaragaye mu mikino 186, atwara ibikombe bibiri bya La Liga, Champions League n’Igikombe cy’Isi cy’Amakipe mbere yo kwerekeza muri PSG afite imyaka 25.

I Paris, yatwaye ibikombe bitanu bya Shampiyona y’u Bufaransa, ahita yerekeza muri Arabie Saoudite.