Ikipe y’u Rwanda yegukanye igikombe mu cyiciro cy’abatarengeje imyaka 16 mu bahungu n’abakobwa naho Kenya yegukana igikombe mu batarengeje imyaka 14 mu byiciro byombi mu irushanwa ry’Akarere ka 4 muri Tennis “ITF/ CAT East African Junior Team’s Championships for 14 & 16 & Under (AJTC)”.
Iri rushanwa ryatangiye taliki 04 kugeza 08 Gicurasi 2022, ryitabiriwe n’ibihugu 7 byo mu Karere ka 4 “Zone 4” birimo u Rwanda, Kenya, Tanzania, Uganda, u Burundi, Comoros na Ethiopia. Imikino yakiniwe ku bibuga biri muri IPRC Kigali ndetse na Sitade Amahoro i Remera.
Ku munsi wa nyuma w’iri rushanwa, taliki 08 Gicurasi 2022, ikipe y’u Rwanda mu bahungu batarengeje imyaka 16 yegukanye igikombe itsinze u Burundi imikino 2-1. Ishimwe Claude yatsinze Abdulshakur Malik (Burundi) amaseti 2-0 (6-4 na 6-2), Hakizumwami Junior yatsinzwe na Gatoto Allan (Burundi) amaseti 2-0 (6-4 na 6-3).
Mu mukino bakina ari babiri, ikipe y’ u Rwanda yari igizwe na Ishimwe Claude na Hakizumwami Junior batsinze Abdulshakur Malik na Gatoto Allan (Burundi), amaseti 2-0 (6-3 na 6-4). Muri iki cyiciro kandi, ikipe ya Kenya yatsinze Uganda imikino 3-0.
Mu bakobwa, ikipe y’u Rwanda yegukanye igikombe itsinze Kenya imikino 2-1. Ishimwe Carine yatsinze Reha Kipsang amaseti 2-0 (6-1 na 6-3) naho Tuyishime Rona atsindwa na Urasa Faith amaseti 2-0 (6-4 na 6-2). Bakina ari babiri, Annabelle Mbayu na Tuyishime Rona batsinze Reha Kipsang na Urasa Faith amaseti 2-0 (6-0 na 6-1).
Muri iki cyiciro habaye n’indi mikino aho Uganda yatsinze u Burundi imikino 3-0 naho Tanzania itsinda Comoros imikino 3-0.
Mu batarengeje imyaka 14, mu bahungu, Kenya yatsinze u Rwanda imikino 2-1, ikipe y’u Burundi itsinda Uganda imikino 2-1. Mu bakobwa Kenya yatsinz u Burundi imikino 3-0 naho Uganda tsinda u Rwanda imikino 2-0.
Uko amakipe yakurikiranye
Mu bahungu batarengeje imyaka 16, ikipe y’u Rwanda yabaye iya mbere n’amanota 4 ikurikirwa n’ u Burundi (3), Kenya (2), Uganda (1) na Tanzania (0). Mu bakobwa, ikipe yu Rwanda yabaye iya mbere n’amanota 5 ikurikirwa na Kenya (4), Tanzania (3), Uganda (2 ), Burundi (1) na Comoros (0).
Mu batarengeje imyaka 14 mu bahungu, Kenya yabaye iya mbere n’amanota 4, ikurikirwa n’u Burundi (3), Uganda (2), Tanzania (1) n’u Rwanda (0). Mu bakobwa, ikipe ya Kenya nho yabaye iya mbere n’amanota Kenya ( 4) ikurikiwe na Tanzania (3), Burundi (2 ), Uganda (1 ) n’u Rwanda (0).
Ikipe y’u Rwanda mu batarengeje imyaka 16 mu bahungu n’abakobwa ndetse na Kenya mu batarengeje imyaka 14 mu byiciro byombi zabonye itike yo kuzahagararira Akarere ka 4 “Zone 4” mu mikino y’Afurika “African Junior Teams’ Championships 2022” izaba muri Kamena 2022 gusa aho izabera ntirahatangazwa.
Nyuma y’iri rushanwa, Perezida w’ishyirahamwe ry’umukino wa Tennis mu Rwanda “RTF”, Karenzi Theoneste yatangaje ko bishimiye ko irushanwa bateguye ryasojwe neza kuko bwari ubwa mbere ribereye mu Rwanda ubundi ryaberaga ahandi.
Ati : “Irushanwa ryageze neza mu buryo buteganywa kandi bwifuzwa n’ishyiramwe mpuzamahanga ry’uyu mukino (ITF).”
Akomeza avuga ko ku ruhande rw’u Rwanda byagenze neza kuko habonetse intsinzi ku makipe yo byiciro byombi mu batarengeje imyaka 16 kandi n’ubusanzwe ubwo iri rushanwa ryaherukaga kuba u Rwanda rwari rwegukanye umwanya wa mbere.
Ati: “ Ubu u Rwanda ruzaserukira aka Karere mu mikino y’Afurika, ni intsinzi rero ishimishije ku mpande ebyiri, uko twateguye ndetse n’uko twakinnye mu kibuga.”
Agaruka ku ikipe y’abataregeje imyaka 14, Perezida wa RTF, Karenzi yavuze ko batitwaye neza ariko bize byinshi bwa kuko bwari ubwa mbere bitabira irushanwa nk’iri. Akomeza avuga ko ubu bagiye gukomeza kubategura ku buryo mu minsi iri imbere bazaba bitwara neza mu bindi byiciro.
Iri rushanwa ry’abatarengeje imyaka 14 na 16 ryabaye nyuma y’irushanwa ry’Akarere ka 4 mu batarengeje imyaka 12 mu bahungu n’abakobwa naryo ryabereye mu Rwanda kuva taliki 27 Mata kugeza 01 Gicurasi 2022.
Ikipe ya Uganda mu bahungu, Kenya n’u Burundi mu bakobwa zabonye itike yo kuzitabira imikino y’Afurika.
Kuba ikipe y’u Rwanda itaritwaye neza, Perezida wa RTF, Karenzi yavuze ko ubundi aya marushanwa aba ari ayo gushakisha impano kuko n’ubwo umukinnyi atatsinda irushanwa ariko ashobora gutoranywa mu bakinnyi beza bakurikiranwa kugira ngo bazavemo abakinnyi bakomeye mu minsi iri imbere.
