50% bafite umuvuduko ukabije w’amaraso batabizi- Prof Mucumbitsi

  • Imvaho Nshya
  • Ukwakira 30, 2023
  • Hashize amezi 4
Image

Umuvuduko ukabije w’amaraso ni imwe mu ntandaro z’indwara z’umutima zibasiye abantu muri iki gihe, ariko by’umwihariko mu bihugu bikiri mu nzira y’amajyambere kandi 50% baba batabizi.

Byatangajwe na Prof Mucumbitsi Joseph, umuganga w’abana uvura n’indwara z’umutima akaba n’uhagarariye Ihuriro ry’Imiryango irwanya indwara zitandura mu Rwanda no muri Afurika y’iburasirazuba.

Yagize ati: “Umuvuduko ukabije w’amaraso ni imwe mu ntandaro y’indwara z’umutima zikomeye ku buryo bivugwa ko mu Isi hari nibura miliyari 1 na miliyoni 280 z’abantu bafite umuvuduko ukabije w’amaraso, abenshi ni uko 2/3 baba mu bihugu biri mu nzira y’amajyambere kandi bavuga yuko hafi 50% bafite umuvuduko mwinshi w’amaraso baba batabizi”.

Yakomeje asobanura ko mu babizi, hari 42% gusa bavurwa, bafata imiti ariko muri abo bafata imiti 50% ntibaba bageze ku muvuduko w’amaraso ku bipimo bikwiye. Ntibaba bafata imiti neza, ntibaba bayifata buri gihe.

Ni ikibazo gikomeye ni rwica ruhoze, nta kimenyetso simusiga bisaba ngo ugere mu mibare ya 180/120 kugira ngo noneho urembe koko utangire ugire ibimenyetso, uzungere, kuruka, kuribwa mu gatuza, guhumeke nabi.

Mbere yaho nk’igihe ufite 140/90 kugeza ku 180/120 Uba ushobora kuba ubigendana wowe nta n’ikibazo wumva ufite usibye rimwe na rimwe.

Yakomeje asobanura ko ikibazo nyamukuru atari umuvuduko w’amaraso gusa, ahubwo bigira ingaruka ku miterere y’imitsi itwara amaraso ku buryo buhoro buhoro mo imbere igenda yononekara, igatakaza kwiregura ikagagaramo imbere igenda yononekara, bigatera ingaruka nyinshi.

Yagize ati: “Izo ngaruka iya mbere na mbere ni ku mutima ubwawo, udutsi tuyigaburira natwo twononekara bigatuma ya mavuta mabi yihomamo, bishobora gutuma ugira ibibazo by’umutima, igice kimwe cy’umutsi w’umutima kirononekara  kubera kubura amaraso ahagije.

Ni bwo umuntu ababara mu gituza, ahumeka nabi, ni bwo iyo ugiye kwa muganga aho habuze amaraso hatari hanini babona umwanya wo kujya kuzibura uwo mutsi umuntu akaba yabirokoka, ariko batabyitayeho umutima ugapfa burundu umuntu akaba yamugara cyangwa umutima ugasigara udakora neza cyangwa akaba yapfa”.

Prof. Mucumbitsi yasobanuye kandi ko kononekara k’utwo dutsi kutagarukira aho gusa, ahubwo biogera no ku bwonko.

Ati: “Ahakurikiyeho hononekara ni mu bwonko ya mitsi ishobora kononekara igafunga, aho igice kimwe cy’amaraso n’umwuka mwiza kitahagera ishobora gutuma bitewe n’uko hangana ushobora kwikubita hasi, kumugara gusa cyangwa se iyo mitsi igaturika mu bwonko hakavamo amaraso (Stroc).

Inzoga ziri mu byongera ibyago byo kugira umuvuduko ukabije w’amaraso

Indi mitsi yononekara bikagira ingaruka zikomeye ni igaburira impyiko, ni umwe mu myanya y’umubiri nk’ubwonko, iyo yononekaye bigorana kugira ngo bazayibonere umuti usibye kuyisimbura”.

Yakomeje asobanura n’indi mitsi ishobora gupfa nk’iyo mu maso hari abagera aho bagahuma, bigira ingaruka ku mitsi igaburira imyanya ndangagitsina, iyo ku maguru, ku maboko n’indi. Ikindi ni uko umuntu atamenya ko afite indwara y’umuvuduko w’umutima ni indwara itagira ibimenyetso simusiga, utabyitayeho nta kundi wamenya ko uyifite utipimishije kandi kutayivuza no kutabyitaho uko bikwiriye bishobora gutera ubumuga butandukanye.

Iyo umuvuduko ukabije w’amaraso wizanye ntisubira inyuma, bisaba ngo umuntu akomeze anywe umutima uba neza ukaba muzima ukaba wakwisazira ariko iyo ukomeje kwirinda intandaro z’uwo muvuduko mwinshi cyangwa ibishobora kuwongera.

Zimwe mu ntandaro z’umuvuduko ukabije w’amaraso harimo gukoresha  umunyu mwinshi, umuntu ntiyagombye kurenza akayiko gato k’umunyu ni ukuvuga hagati ya garama 5-6 ku munsi, kwirinda inzoga ahubwo hagakoreshwa imboga n’imbuto nyinshi.

NYIRANEZA JUDITH

  • Imvaho Nshya
  • Ukwakira 30, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE