Volleyball: Misiri yegukanye igikombe cy’Afurika, ikipe y’u Rwanda isoreza ku mwanya wa 8

Kuva taliki 15 kugeza 22 Kanama 2022  i Tunis muri Tunisia habereye  irushanwa ry’Afurika mu batarengeje imyaka 21 mu mukino wa Volleyball  mu bahungu “U-21 Men’s Africa Nations Volleyball Championship 2022”. Ikipe ya Misiri yegukanye igikombe  naho ikipe y’u Rwanda isoreza ku mwanya wa nyuma wa 8.

Iri rushanwa ryari ryitabiriwe n’amakipe 8 aho yari mu matsinda abiri. Itsinda A ryari ririmo Tunisia, Nigeria, Maroc na Gambia naho itsinda B ririmo Misiri, Cameroun, u Rwanda na Libiya.

Ikipe ya Misiri ni yo yegukanye igikombe itsinze ku mukino wa nyuma ikipe ya Tunisia amaseti 3-1 (25-17, 25-22, 21-25 na 25-23). Misiri yari yageze ku mukino wa nyuma isezereye Nigeria muri ½  iyitsinze amaseti 3-1 na hoTunisia isezerera Cameroun iyitsinze amaseti 3-0.

Iyi kipe ya Misiri yisubije iki gikombe dore ko ari yo yari igifite nyuma yo kucyegukana muri 2020 ubwo iyi mikino y’Afurika yaberega i Cairo mu Misiri.

Mu guhatanira umwanya wa 3, ikipe ya Cameroun yitwaye neza itsinda Nigeria amaseti 3-0 (25-21, 25-20 na 25-23).

Ikipe ya Libiya yegukanye umwanya wa 5 itsinze Gambia amaseti 3-0 (25-23, 25-19 na 25-23) naho ku mwanya wa 7 hasoreza ikipe ya Maroc itsinze u Rwanda amaseti 3-1 (25-23,31-29, 18-25 na 25-14).

Hatowe ikipe y’irushanwa

Opposite: David Nkeme (Cameroun)

Middle Blocker: Ibrahim Ahmed (Misiri) na Azohoye Pascal Geoffrey (Nigeria)

Outside Hitter: Awad Hamza (Misiri) na Jaiyeola Abdulquadri Opeyemi (Nigaria)

Setter: Baccour Walid Wokhtar (Tunisia)

Libero: Ben Mabrouk Maleck (Tunisia)

Umukinnyi witwaye neza mu irushanwa ryose “MVP” yabaye Kavogo Yaoussi (Cameroun).

Uko amakipe yakurikiranye

Ikipe yabaye iya mbere ni Misiri aho yakurikiwe na Tunisia (2), Cameroun (3), Nigeria (4), Libiya (5), Gambia (6), Maroc (7) n’u Rwanda (8).

Uko ikipe  y’u Rwanda yitwaye

Ikipe y’u Rwanda  mu mikino y’amajonjora mu itsinda B yatsinzwe na Libiya amaseti 3-1 (25-18,25-13, 24-26 na 25-8), itsindwa na Cameroun amaseti 3-0 (25-16, 25-18 na 25-20) inatsindwa na Misiri amaseti 3-0 (25-16, 25-13 na 25-13).

Kuko amakipe yari yitabiriye ari 8 yahise akomeza muri ¼ maze ikipe y’u Rwanda yari yabaye iya nyuma mu itsinda B ihura na Tunisia yari yazamutse iyoboye itsinda A.

Muri uyu mukino wa ¼ , ikipe ya Tunisia yatsinze u Rwanda amaseti 3-0 (25-23,25-15 na 25-15).

Nyuma yo gusezererwa muri ¼ , ikipe y’u Rwanda yakinnye imikino yo guhatanira imyanya aho  yatsinzwe na Gambia  amaseti 3-0 (25-11,25-13 na 25-14) mu guhatanira imyanya ya 5-8.

Mu guhatanira umwanya wa 7, ikipe ya Maroc yatsinze u Rwanda amaseti 3-1 (25-23, 31-29, 18-25 na 25-14) bituma isoreza ku mwanya wa nyuma nta mukino n’umwe itsinze.

Ni ubwa mbere ikipe y’u Rwanda isoreje ku mwanya mubi muri iyi mikino kuko  muri 2010, ikipe y’u Rwanda U-21 yegukanye umwanya wa kane, muri 2013 yegukana umwanya wa 3 inabona itike y’igikombe cy’Isi  cyabereye muri Turukiya. Muri 2018 ubwo imikino y’Afurika yaberaga muri Nigeria yasoreje ku mwanya wa 4.

Abakinnyi bari baserukiye u Rwanda

Setter:  Kayihura Victor (Gisagara VC) na Rugambarara Aime Calvin (PSVF).

Middle: Ntayomba Arnaud (S^t Joseph), Mugisha Rurangwa Irene (Christ Roi) na Nshuti Arnaud (PSVF).

Left/Receiver: Nshuti Jean Paul (S^t Joseph), Patrick Ishimwe (GSOB), Gisubizo Merci (APR VC) na Rukundo Willy (S^t Joseph).

Opposite: Singizwa Philippe Neri na Tugizumukiza Herve (Christ Roi)

Libero: Ivan Bagabe  (Christ Roi).

Umutoza mukuru yari  Ntawangundi Dominique yungirijwe na Hatungimana Jean Claude.