Volleyball: Ikipe ya REG VC na APR VC zegukanye irushanwa ryo Kwibuka

  • Imvaho Nshya
  • Kamena 6, 2022
  • Hashize imyaka 2
Image

Ikipe ya REG VC mu bagabo na APR VC mu bagore ni zo zegukanye irushanwa ryo Kwibuka abari abakinnyi, abayobozi, abatoza n’abandi bari mu muryango mugari wa Volleyball bazize Jenoside yakorewe Abatutsi mu 1994 “Volleyball Genocide Memorial Tournament 2022”.

Iri rushanwa ryabereye mu Karere ka Gisagara na Huye taliki 04 na 05 Kamena 2022, ryari ryitabiriwe n’amakipe 12 mu bagabo aho yari mu matsinda 4. Ikipe ya Gisagara VC, Kirehe VC na Gihisi TVET zari mu itsinda A , REG VC, Christ Roi na GSO Butare mu itsinda B. Ikipe ya APR VC, IPRC Musanze na GS St Joseph  zari mu tsinda C mu gihe itsinda D ryari ririmo IPRC Ngoma, UR CMHS na Petit Seminaire  VF.

Ku ruhande rw’abagore hari hitabiriye amakipe  9 ashyirwa mu matsinda atatu, itsinda A ryari ririmo RRA VC, GS St Joseph na IPRC Kigali, itsinda B ryari ririmo APR VC, Ruhango VC na UR Gikondo naho itsinda  C ririmo UVC, IPRC Huye na St Bernadette.

Mu bagabo, ikipe ya REG VC yegukanye igikombe itsinze ku mukino wa nyuma Gisagara VC yari ifite igikombe giheruka amaseti 3-2 (20-25, 21-25, 25-22, 25-20 na 15-11). REG VC yari yageze ku mukino wa nyuma isezereye Kirehe VC muri  ½  ku  maseti 3-1 (25-17,16-25,25-19 na 25-15) naho Gisagara VC isezerera APR VC ku maseti  3-1 (25-17,16-25,25-18 na 25-19).

Umukino wa REG VC na Gisagara VC wari unogeye ijisho

Mu guhatanira umwanya wa gatatu, ikipe ya APR VC yatsinze Kirehe VC amaseti 3-0 (25-22, 25-16 na 25-22).

Umutoza mukuru wa REG VC, Kwizera Pierre Marchal  nyuma yo kwegukana igikombe yatangaje ko yishimye cyane kuba agarutse mu ikipe ya REG VC agahita atwara igikombe.

Muri uyu mukino, REG VC yatsinzwe amaseti abiri ya mbere irayishyura itsinda n’iseti ya 5 yegukana intsinzi.

Abakinnyi ba REG VC bateruye umutoza Kwizera

Umutoza Kwizera yaragaje ko REG VC ari  ikipe nziza irimo abakinnyi bakuru bamenyereye amarushanwa kuva inyuma rero bagatsinda umukino  ari ikintu cyoroshye.

Akomeza avuga ko icyamufashije gutsinda Gisagara VC ari uko yahinduranyije imyanya y’abakinnyi  bikamukundira.  Ati : “Hari abakinnyi banjye bahuraga n’aba Gisagara VC imbere  bakabazibira ntibatsinde, nahinduye imyanya ubugira gatatu bigeze aho birakunda.”

Umutoza wa Gisagara VC, Nyirimana Fidele we yavuze ko  gutsindwa byatewe ahanini n’umunaniro ndetse n’uburwayi abakinnyi be bafite. Yagize ati : “ Twakinnye n’ikipe ikomeye yagumye mu mukino birangira idutsinze.”

Mu bagore, ikipe ya APR VC yegukanye igikombe itsinze RRA VC amaseti 3-2 (25-21, 24-26, 19-25,25-23 na 15-11). Ikipe ya APR VC yari yageze ku mukino wa nyuma itsinze  IPRC Kigali muri ½ ku maseti 3-0 (25-19, 25-18 na 25-12) naho RRA VC isezerera  UVC  ku maseti 3-2 ( 16-25,25-15,16-25 na 15-11).

Ikipe ya APR VC

Nyuma yo kwegukana igikombe, umutoza wa APR VC, Siborurema Florien yatangaje ko wari umukino ukomeye kuko amakipe yari hejuru cyane. Avuga ko  nta rindi banga yakoresheje ahubwo abakinnyi bazamuye urwego kubera imikino y’Afurika bavuyemo.

umutoza wa APR VC, Siborurema Florien (ubanza iburyo)

Perezida w’ishyirahamwe ry’umukino wa Volleyball mu Rwanda “FRVB”,  Ngarambe Raphaël  yavuze ko iri rushanwa ryagenze neza, amakipe yagaragaje umukino uri ku rwego rwiza.

Perezida wa FRVB, Ngarambe Raphaël

Iri rushanwa nta bwo ryagaragayemo amakipe yo hanze nk’uko byari bisanzwe,Ngarambe avuga ko  bari bayatumiye ariko ntiyabasha kwitabira kubera imbogamizi zitadukanye.

Umunyamabanga Uhoraho muri Minisiteri ya Siporo “MINISPORTS”, Shema Maboko Didier yashimiye FRVB na Komite Olempike y’u Rwanda bateguye iri rushanwa. Yongeye gusaba abari mu  muryango mugari wa siporo kubaka igihugu ndetse n’umuryango uzira amacakubiri.

Umunyamabanga Uhoraho muri MINISPORTS, Shema Maboko Didier

Ibihembo byatanzwe

Mu bagabo, REG VC yegukanye igikombe ihabwa  miliyoni imwe y’amafaranga y’u Rwanda, ku mwanya wa kabiri haje  Gisagara VC   yahawe ibihumbi 600 naho ku mwanya wa 3  haza APR VC  yahawe ibihumbi 400.

Mu bagore, APR VC  yegukanye igikombe ihabwa na miliyoni imwe, RRA VC yaje ku mwanya wa kabiri ihabwa ibihumbi 600 naho ku mwanya wa 3 haza UVC ihabwa ibihumbi 400.

Ku ruhande rw’abakinnyi ku giti cyabo, mu bagabo  uwahaye imipira bagenzi be neza  “Best Setter” yabaye Mahoro Yvan  (REG VC), uwateye  neza imipira ya mbere mu kibuga cy’ikipe bahanganye “Best Server” yabaye Muvara Ronald (Gisagara VC), uwagaruye imipira neza “Best Receiver” aba  Akumuntu Kavalo Patrick (Gisagara VC), uwatsinze kurusha abandi “Best Attacker” aba Okello Daudi (REG VC), uwazibiye imipira kurusha abandi “Best Blocker” aba  Mbonigaba Vincent (APR VC), Libero aba Rwigema Simon (REG VC) naho umukinnyi witwaye neza mu irushanwa ryose “MVP” aba Okello Daudi (REG VC).

Okello Daudi witwaye neza mu irushanwa ryose “MVP”

Mu bagore,  uwahaye imipira bagenzi be neza  “Best Setter” yabaye Akimanizanye Ernestine (RRA), uwateye  neza imipira ya mbere mu kibuga cy’ikipe bahanganye “Best Server” aba Bayija Yvonne (APR VB), uwagaruye imipira neza “Best Receiver” aba Munezero Valentine (APR VC), uwatsinze kurusha abandi “Best Attacker” aba Yankurije Françoise (APR VC), uwazibiye imipira kurusha abandi “Best Blocker”  yabaye Uwiringiyimana Albertine (APR VC), Libero aba Uzamukunda Fillette (RRA VC) naho umukinnyi witwaye neza mu irushanwa ryose aba Nzamukosha Olive (RRA VC).

Nzamukosha Olive (RRA VC) witwaye neza mu irushanwa ryose “MVP”

Photo: Shema Innocent

  • Imvaho Nshya
  • Kamena 6, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE