Volleyball: Ikipe ya REG VC na APR VC zegukanye irushanwa ryo gushimira abasora

  • Imvaho Nshya
  • Ugushyingo 22, 2022
  • Hashize umwaka 1
Image

Ishyirahamwe ry’umukino wa Volleyball mu Rwanda “FRVB” ku nkunga y’Ikigo cy’Igihugu cy’Imisoro n’Amahoro “RRA” hateguwe ku nshuro ya kabiri irushanwa ryo gushimira abasora “Taxpayers Appreciation Volleyball Tournament 2022″ ryabaye taliki 19 na 20 Ugushyingo 2022.

Ikipe ya REG VC mu bagabo na APR VC mu bagore ni zo zegukanye iri rushanwa aho zitwaye neza ku mukino wa nyuma wabereye muri BK Arena.

Mu bagabo iri rushanwa ryari ryitabiriwe n’amakipe 6 aho yari agabanyije mu matsinda abiri, itsinda A ryari rigizwe na Gisagara VC, REG VC na KVC naho  itsinda B ririmo APR VC, ForeFront VC na IPRC Musanze VC.

Nyuma y’imikino y’amajonjora, ikipe ya Gisagara VC yahuye na ForeFront VC muri ½ cy’irangiza iyisezerera ku maseti 3-1 (25-27, 25-23, 25-23  na 25-23) naho ikipe ya REG VC itsinda APR VC amaseti 3-1  (21-25, 25-14, 26-24 na 25-19).

Ikipe ya ForeFront VC yegukanye umwanya wa 3 itsinze ikipe ya APR VC amaseti 3-1.

Ku mukino wa nyuma, ikipe ya REG VC yatsinze Gisagara VC amaseti 3-1 (26-24, 31-29, 20-25 na 25-18).

Mu bagore   naho hitabiriye amakipe 6  aho yari mu matsinda abiri, itsinda A ryari rigizwe na RRA VC, IPRC Huye na Ruhango VC naho itsinda B rigizwe na ForeFront VC,  APR VC na IPRC Kigali VC.

Nyuma y’imikino y’amajonjora mu matsinda, ikipe ya RRA VC yatsinze ForeFront VC muri ½ cy’irangiza amaseti 3-1  (25-15, 20-25, 25-21 na 25-9) naho  APR VC itsinda  Ruhango VC amaseti 3-0 (25-13,25-12 na 25-13)

Ikipe ya ForeFront VC ni yo yegukanye umwanya wa 3  itsinze Ruhango VC amaseti 3-0.

Ku mukino wa nyuma, ikipe ya APR VC yatsinze RRA VC amaseti 3-1  (26-24, 25-19, 23-25 na 25-19)

Ibihembo byatanzwe

Ikipe ya mbere mu bagabo n’abagore (REG VC na APR VC) zahawe imidali, igikombe ndetse na miliyoni 2 z’amafaranga y’u Rwanda.

Ikipe ya APR VC ubwo yashyikirizwaga igikombe

Ku mwanya wa kabiri mu bagabo n’abagore (Gisagara VC na RRA VC) zahawe imidali na miliyoni 1.5 y’amafaranga y’u Rwanda.

Ikipe ya Gisagara VC mu bagabo
Ikipe ya RRA VC yabaye iya kabiri

Ikipe ya ForeFront VC yegukanye umwanya wa gatatu  mu bagabo n’abagore ihabwa miliyoni 1 y’amafaranga y’u Rwanda.

Ikipe ya ForeFront VC mu bagabo
Ikipe ya ForeFront VC mu bagore

Ku ruhande rw’abakinnyi ku giti cyabo, mu bagabo, Marcel Guiondong ukinira ikipe ya REG VC yegukanye ibihembo bitatu aho yabaye uwateye  neza imipira ya mbere mu kibuga cy’ikipe bahanganye “Best Server”, uwatsinze kurusha abandi “Best Attacker” ndetse n’umukinnyi  witwaye neza mu irushanwa ryose “MVP”.

Uwahaye imipira bagenzi be neza  “Best Setter” yabaye Mahoro Yvan  (REG VC), uwagaruye imipira neza “Best Receiver” aba  Akumuntu Kavalo Patrick (Gisagara VC), uwazibiye imipira kurusha abandi “Best Blocker” ni  Rukerangabo Yvan (Forefront VC) naho Libero aba Rwigema Simon (REG VC).

Marcel Guiondong (REG VC)

Mu bagore,  uwahaye imipira bagenzi be neza  “Best Setter” ni Akimanizanye Ernestine (RRA VC), uwateye  neza imipira ya mbere mu kibuga cy’ikipe bahanganye “Best Server” ni  Munezero Valentine (APR VC ), uwagaruye imipira neza “Best Receiver” ni Mukandayisenga Benitha (APR VC), uwatsinze kurusha abandi “Best Attacker” ni Msisai Pamella (RRA VC), uwazibiye imipira kurusha abandi “Best Blocker”  ni Amito Shallon(Forefront), Libero ni  Betty Uwamahoro (APR VC) naho umukinnyi witwaye neza mu irushanwa ryose ni  Mukantambara Seraphine (APR VC).

Mukantambara Seraphine (APR VC)

Iri rushanwa ryateguwe  muri gahunda ngarukamwaka yo  gushimira abasora. Uyu mwaka wa 2022 ukaba warahuriranye no kwizihiza imyaka 25  RRA imaze ishinzwe ndetse n’imyaka 20 ishize haba iki gikorwa cyo gushimira abasora.

Umwaka ushize wa 2021,  iri rushanwa ryari ryegukanwe na Gisagara VC mu bagabo ndetse na RRA VC mu bagore.

  • Imvaho Nshya
  • Ugushyingo 22, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE