Volleyball: Gisagara VC na APR VC zatangiye neza  shampiyona

Ikipe ya Gisagara VC mu bagabo na APR VC mu bagore zitwaye neza ku munsi wa mbere wa shampiyona ya Volleyball “Rwanda National Volleyball League 2022-2023”.

Imikino ya shampiyona ya Volleyball mu bagabo n’abagore  yatangiriye mu Karere ka Gisagara na Huye taliki 01 na 02 Ukwakira 2022.

Uyu mwaka  uburyo buzakoreshwa, amakipe azajya ahurira ahantu hamwe mu gihe cy’iminsi ibiri  akine hagati yayo hanyuma habe imikino ya ½ n’umukino wa nyuma ndetse no guhatanira imyanya kugira ngo hakorwe urutonde.

Mu mpera z’icyumweru gishize taliki 01 na 02 Ukwakira 2022, imikino ya shampiyona ni bwo yatangiye aho mu bagabo hitabiriye amakipe 8 ari yo REG BBC, Gisagara VC, APR VC, IPRC Ngoma, IPRC Musanze, KVC, Kirehe VC na ForeFront VC naho mu bagore ni amakipe 7 ari yo  RRA VC, ForeFront VC , APR VC, Ruhango VC, IPRC Kigali VC, IPRC Huye VC na S^t Bernadette VC. Iyi kipe ya ForeFront VC ikaba ari iyahoze ari UTB VC.

Mu bagabo nyuma y’imikino y’amajonjora, ikipe ya Gisagara VC ni yo yitwaye neza yegukana umwanya wa mbere itsinze REG VC amaseti 3-0 (25-19, 25-14 na 25-22).

Ikipe ya Gisagara VC yari yageze ku mukino wa nyuma itsinze bigoranye ikipe ya APR VC amaseti 3-2 (23-25, 25-23, 25-19, 28-30 na 18-16).  Naho  REG VC yatsinze   IPRC Ngoma VC  amaseti 3-0 (25-23,25-18 na 25-20)

Mu guhatanira umwanya wa 3, APR VC yatsinze  IPRC Ngoma VC  amaseti 3-0.

Nyuma y’imikino y’umunsi wa mbere, ikipe ya Gisagara VC iyoboye urutonde n’amaota 8, ikurikiwe na REG VC n’amanota 7, APR VC ku mwanya wa 3 n’amanota 6. Ku mwanya wa 4 hari  IPRC Ngoma VC n’amanota 5, ForeFront VC (4), Kirehe VC (3), IPRC Musanze VC (2) na KVC (1).

Umutoza wa Gisagara VC, Nyiramana Fidele yatangaje ko bishimiye gusoza aka gace ka mbere bari ku mwanya wa mbere. Yakomeje avuga ko impamvu bitwaye neza ku mukino wa REG VC ari uko nyuma yo gutsinda ikipe ya APR VC bigoye hari ibyo baganiriyeho barakosora bituma umukino wa REG VC utabagora.

Umutoza Nyirimana avuga ko bagiye gukomeza kwitegura kuko imikino igihari gusa intego bafite akaba ari ukwitwara neza.

Mu bagore, ikipe ya APR VC yegukanye umwanya wa mbere itsinze ForeFront VC amaseti 3-0 (25-18, 25-18 na 25-17).

Ikipe ya APR VC yari yatsinze  muri ½  ikipe ya RRA VC iyitsinze amaseti  3-0 (25-23, 25-16 na 26-4) naho ForeFront VC itsinda Ruhango VC amaseti 3-0 (25-18,25-15 na 25-18).

Mu guhatanira umwanya wa 3, ikipe ya RRA  VC yatsinze Ruhango VC amaseti 3-0 (25-13, 25-13 na 25-16).

Nyuma y’umunsi wa mbere, APR VC iyoboye urutonde n’amanota 7, ikurikiwe na ForeFront VC (6), RRA VC (5),  Ruhango VC (4),  IPRC Kigali VC (3),  IPRC Huye VC (2) na S^t Bernadette VC (1).

Umutoza wa APR VC, Siborurema Florien yatangaje ko umunsi wa mbere wabagendekeye neza kuko bifuzaga ko batangira bayoboye none bikaba byabakundiye. Akomeza avuga ko bagiye gukomeza kwitegura ibindi byiciro bikurikiraho.

Perezida w’ishyirahamwe ry’umukino wa Volleyball mu Rwanda “FRVB”,  Ngarambe Raphaël  yavuze ko umunsi wa mbere wagenze neza, amakipe yakinnye Volleyball iri ku rwego rwo hejuru nubwo bamwe mu bakinnyi bari bamaze igihe badakina.

Shampiyona y’u Rwanda mu mukino wa Volleyball izakomeza  taliki 15 na 16 Ukwakira 2022 gusa ntiharemezwa aha imikino izakinirwa.