Volleyball: ForeFront VC na APR VC zitwaye neza ku munsi wa kabiri wa shampiyona
-
- Ukwakira 25, 2022
- Hashize imyaka 4
Ikipe ya ForeFront VC mu bagabo na APR VC mu bagore ni zo zitwaye neza mu mikino y’umunsi wa kabiri wa shampiyona y’icyiciro cya mbere muri Volleyball “Rwanda National Volleyball League 2022-2023”, imikino yabaye taliki 22 na 23 Ukwakira 2022.
Mu bagabo imikino yabereye mu Busanza aho ikipe Gisagara VC yatsinze KVC amaseti 3-0, REG VC itsinda IPRC Musanze amaseti 3-1, APR VC itsinda Kirehe VC amaseti 3-0 naho ForeFront VC itsinda IPRC Ngoma amaseti 3-1.
Amakipe yitwaye neza yakomeje muri ½ aho ikipe ForeFront VC yatsinze REG VC amaseti 3-0 (25-23, 25-21 na 25-15) naho APR VC itsinda Gisagara VC amaseti 3-2 (25-23,25-27,28-26,20-25 na 17-15).
Ikipe ya ForeFront VC mu guhatanira umwanya wa mbere yatsinze ikipe ya APR VC amaseti 3-1 (27-25, 20-25, 25-20 na 25-21). Ikipe ya REG VC yegukanye umwanya wa 3 itsinze Gisagara VC amaseti 3-0.
Iyi kipe ya ForeFront VC yasoreje ku mwanya wa mbere n’amanota 8, ikurikirwa na APR VC n’amanota 7, REG VC (6), Gisagara VC (5), Kirehe VC (4), IPRC Musanze (3), IPRC Ngoma (2) na KVC (1).
Muri rusange, ikipe ya Gisaraga VC yari yegukanye agace ka mbere ni yo iyoboye aho ifite amanota 13 inganya na REG VC iri ku mwanya wa kabiri na APR VC iri ku mwanya wa 3. Ikipe ya ForeFront VC iri ku mwanya wa 4 n’amanota 12, Kirehe VC (7), IPRC Ngoma (7), IPRC Musanze (3) na KVC (2).
Mu bagore, APR VC yongeye kwitwara neza
Nyuma yo kwegukana agace ka mbere “Phase 1”, ikipe ya APR VC nta bwo yakinnye imikino y’amajonjora ku munsi wa kabiri.
Muri iyi mikino yabereye muri Notre Dame des Anges Primary School i Remera, ikipe ya ForeFront VC yatsinze St Bernadette amaseti 3-0, RRA VC itsinda IPRC Huye amaseti 3-0, IPRC Kigali itsinda Ruhango VC amaseti 3-2.
Muri ½, ikipe ya APR VC yatsinze RRA VC amaseti 3-0 (25-13,25-22 na 25-17) naho ForeFront VC itsinda IPRC Kigali amaseti 3-0 (25-12, 25-19 na 25-13).
Mu guhatanira umwanya wa mbere, ikipe ya APR VC yatsinze ForeFront VC amaseti 3-1 (23-25, 25-15, 25-17 na 25-14) naho ikipe ya RRA VC yegukanye umwanya wa 3 itsinze IPRC Kigali amaseti 3-0.
Ikipe ya APR VC yasoje iyoboye agace ka kabiri n’amanota 7 ikurikirwa na ForeFront VC n’amanota 6, RRA VC (5), IPRC Kigali (4), Ruhango VC (3), IPRC Huye (2) na St Bernadette (1).
Muri rusange nyuma y’uduce tubiri, ikipe ya APR VC irayoboye n’amanota 14 ikurikiwe na ForeFront VC (12), RRA VC (10), Ruhango VC (7), IPRC Kigali (7), IPRC Huye (4) na St Bernadette (2).
Imikino y’umunsi wa gatatu “Phase 3” izabera mu Karere ka Kirehe taliki 29 na 30 Ukwakira 2022.
-
- Ukwakira 25, 2022
- Hashize imyaka 4
