Volleyball: APR VC na Police WVC begukanye irushanwa ryo Gushimira Abasora neza

  • Imvaho Nshya
  • Ugushyingo 13, 2023
  • Hashize amezi 7
Image

Mu bagabo, Ikipe ya APR VC yatsinze Kepler Universit VC amaseti 3-2, naho mu bagore Police WVC yatsinze Rwanda Revenue Authority amaseti 3-1  zegukana irushanwa ryo gushimira abasora neza ‘’Taxpayers Appreciation Volleyball Tournament 2023’’

Iri rushanwa ryakinwaga ku nshuro ya gatatu ryasorejwe kuri iki cyumweru tariki 12 Ugushyingo 2023 muri BK Arena.

Umukino wa APR VC na Kepler VC watangiranye imbaraga zidasanzwe hagati y’impande zombi kuko iseti ya mbere yagoranye cyane nyuma yo kubura ikipe ishyiramo indi ikinyuranyo cy’amanota abiri.

Iyi seti yaje kurangira APR VC itsinze Kepler amanota 36-34.

Mu iseti ya kabiri iyi kaminuza yazanye imbaraga nyinshi iyitsinda mu buryo bworoshye ku manota 25 kuri 16 ya APR VC.

Kepler University yakomeje gukina neza cyane mu itsinda n’iseti ya gatatu maze iyi iyitsinda ku manota 25 kuri 21 ya APR VC.

Mu iseti ya kane, APR VC yasubiye mu mukino yigaranzura Kepler VC yari yayishyizemo ikinyuranyo ariko iza kuyitsinda ku manota 25-23.

Amakipe yombi yagize intsinzi z’amaseti 2-2 bityo hitabazwa iya kamarampaka ‘Seoul’ yo gutanguranwa amanota 15.

Muri iyi seti APR VC yagaragaje ko ari ikipe nkuru iyitsinda ku manota 15 kuri 13 ya Kepler VC.

Muri rusange, APR VC yegukanye Irushanwa ryo gushimira abasora neza itsinze Kepler VC amaseti 3-2 (36-34, 16-24, 21-25, 25-23, 15-13).

APR VC yahawe igikombe na miliyoni 2 z’amafaranga y’u Rwanda, Kepler VC ya kabiri yashyikirijwe miliyoni 1.5 y’amafaranga y’u Rwanda mu gihe Police VC ya gatatu yabonye miliyoni 1 y’amafaranga y’u Rwanda.

Umukinnyi mwiza w’irushanwa yabaye Gatsinzi Venuste wa APR VC.

Police WVC yegukanye igikombe mu bagore.

Umukino wa Police WVC na Rwanda Revenue Authority watangiye Ikipe ya Polisi y’Igihugu itsinda amanota menshi, mu gihe iy’Ikigo cy’Imisoro n’Amahoro yo abakinnyi bayo bataga imipira myinshi hanze.

Iseti ya mbere yarangiye Police WVC itsinze RRA WVC amanota 25-19.

Mu iseti ya kabiri RRA WVC yagarukanye imbaraga nyinshi bitandukanye nuko bakinnye iseti ya mbere maze iyitsinda ku manota 25 kuri 21 ya Police WVC.

Aya makipe yose azahita akomeza mu Irushanwa Nyafurika rya ‘Zone 5’ rihuza amakipe yo mu karere k’Afurika y’Iburasirazuba ritangira ku wa Kabiri tariki 14 Ugushyingo kugeza ku wa 20 Ugushyingo 2023 muri BK Arena.

Ubwo iyi mikino yari isojwe, Ishyirahamwe ryumukino wa Volleyball mu Rwanda, FRVB, ryashimiye Umuyobozi w’Ishuri rya GS St Aloys Rwamagana, Furere Rudasingwa Camille, wagize uruhare mu kuzamura abakinnyi benshi barinyuzemo.

SHEMA IVAN

  • Imvaho Nshya
  • Ugushyingo 13, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE