Uyu munsi mu Rwanda, uburinganire ni ihame- Jeannette Kagame

  • NTAWITONDA JEAN CLAUDE
  • Ukwakira 25, 2022
  • Hashize umwaka 1
Image

Uwagarura abakurambere batigeze batekereza ko n’umugore ashobora guhagarara mu ruhando rw’abagabo agafata ijambo, agafata icyemezo gikiza abandi, akaba ushaka umugati utunga umuryango afatanyije n’umugabo, bashobora kwibaza ko bageze ku yindi Si itari iyo bakuriyemo.

Madamu Jeannette Kagame yagaragaje ishusho y’uburyo mu myaka amagana ishize icyuho mu buringanire bw’abagore n’abakobwa cyamunze iterambere ry’umuryango ku Isi, muri Afurika no mu Rwanda by’umwihariko, ku buryo ingaruka zikigera ku bisekuru by’iki gihe.

Mu ijambo yagejeje ku Nama y’Ihuriro ry’Abagiraneza bakorera ku mugabane w’Afurika (African Philanthropy Forum/APF 2022), Madamu Jeannette Kagame yavuze ko u Rwanda rwanze kwemera ko abagore n’abakobwa barwo bakomeza kubaho badakunzwe, batarinzwe, cyangwa batumvwa.

Uru munsi amategeko y’u Rwanda yemerera abagore n’abakobwa uburenganzira bungana ku gutunga ubutaka no ku izungura ry’imitungo y’ababyeyi, baba ari abagore bashatse abagabo ndetse n’uburenganzira bunganga ku bana b’abahungu n’abakobwa.

Yagaragaje ko hakiri urugendo, agaragaza umusaruro ufatika umaze gutangwa n’ubukangurambaga bwakozwe mu myaka myinshi, aho kuri ubu nibura 30% by’abarimu nzego za Leta zifata ibyemezo ari abagore, bakaba bicaye muri 61% by’Intebe zo mu Nteko Ishinga Amategeko, bakagira 58.6% by’abakozi ba Leta ndetse no mu rwego rw’ubutabera bakaba bageze kuri 50%.

Ati: “Uyu munsi mu Rwanda, uburinganire nk’ihame by’umwihariko hagati y’abagore n’abagabo, bwabaye umusingi w’ingenzi mu kugabanya ubukana abw’icyuho cy’ubusumbane bw’abagabo n’abagore.”

Yakomeje agira ati: “Ndizera ko abenshi muri mwe mwumva neza ko intangiriro y’Umuryango wanjye, Imbuto Foundation, wagombaga gukura icyitegererezo ku gihugu cyacu. Ku bufatanye n’abafatanyabikorwa bacu, twavuye kure mu gutanga ibisubizo bihamye kuri ibi bibazo, n’ibindi ntavuze.”  

Yongeyeho kuva ku munsi wa mbere w’ishingwa ry’uyu muryango, bagize umugisha wo kuba mu gihugu cyateguye neza inzira iganisha ku ntsinzi, iganisha ku kubaka umuryango udaheza, utera imbere, wumvikana aho abawugize bose bareshya imbere y’amategeko.

Yavuze ko miliyoni 50 z’amadolari y’Amerika zigiye gutegurirwa gushorwa muri gahunda yo gukuraho icyuho mu buringanire zikwiye kongerwa kuko nta giciro umuntu yaha urugamba rwo kubohora umugore, by’umwihariko mu guharanira ubwigenge bwuzuye bw’abagore ku bukungu.

Ati: “Uyu munsi dushobora kubaka imashini ihindura igihe dufatanyije. Dushobora kuzana 2172, umwaka aho abagore bazaba bareshya n’abagabo mu bijyanye n’ubukungu, ukaza mu hazaza ha vuba cyangwa nonaha.”

Yemeza ko nubwo bigaragara nk’ibikomeye ariko bishoboka mu gihe hashyizweho Poltiki n’amategeko bihamye, hakagaragara ubushake bwa Politiki, ubufatanye buhoraho hagati y’abagiraneza na Guverinoma no guha urubuga rusesuye abagenerwabikorwa uhereye mu itegurwa ry’ibibakorerwa ukageza mu ishyirwa mu bikorwa ryabyo.

Ati: “Nitwongera guhura mu myaka 10 iri imbere uhereye uyu munsi, twishimira ibyagezweho na Gahunda yo Kwimakaza Uburinganire muri Afurika, ndabizeza ko ukwiyemeza kwacu kuzaba gushyigikiwe n’imbaraga zose twabishyizemo.”

Yashimiye Tsitsi Masiyiwa ukuriye APF, ukomeje kugaragaza ukwiyemeza gushikamye mu gutegura ahazaza harushijeho kuba heza h’abana b’abakobwa. Yashimye kandi abagize Inama y’Ubutegetsi ya APF bamutumije mu gikorwa cyo gutangiza gahunda igamije gutegura ahazaza h’abagore n’umuryango muri rusange.

  • NTAWITONDA JEAN CLAUDE
  • Ukwakira 25, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE