Urwego rw’Umuvunyi rwasobanuye imikorere ya Komite zirwanya ruswa

  • Imvaho Nshya
  • Nyakanga 10, 2023
  • Hashize amezi 10
Image

Urwego rw’Umuvunyi rusobanura ko ruhugura Komite zishinzwe kurwanya ruswa mu bigo n’inzego za Leta no mu bigo by’abikorera no mu miryango itari iya Leta ikorera mu gihugu n’imvamahanga.

Mbarubukeye Xavier, Umunyamabanga Uhoraho w’Urwego rw’Umuvunyi, asaba abagize izo Komite gufasha ibigo bakoramo guhangana n’ahashobora kuba ibyuho bya ruswa. 

Kurwanya ruswa mu nzego, biteganywa mu itegeko ryo kurwanya ruswa aho mu ngingo yaryo ya 03 riteganya ko buri rwego rwa Leta, urw’abikorera, imiryango itari iya Leta, yaba iyo mu gihugu cyangwa mvamahanga, izo nzego zose zigomba gushyiraho komite zo gukumira ruswa.

Abamaze gufata ingamba babigiriwemo inama n’Urwego rw’Umuvunyi, hari abashyizeho izo komite zo kurwanya ruswa.

Kugira ngo izo komite zikore neza, Urwego rw’Umuvunyi rwatangiye gahunda zo guhugura izo komite.

Mbarubukeye yagize ati: “Icyo komite zishinzwe ni ugufasha umuyobozi w’urwego rw’ikigo mu gushyira mu bikorwa ingamba zo gukumira ruswa mu kigo”.

Avuga ko ari inshingano y’ingenzi kuko ngo itegeko riteganya n’ibihano ku muyobozi w’urwego cyangwa ikigo utarashyizeho ingamba zizajya zifasha mu nshingano z’ikigo.

Ubundi buryo bwo gukumira ruswa, ni ukumenyekanisha ububi bw’icyaha cya ruswa nkuko bisobanurwa n’Urwego rw’Umuvunyi.

Ibyo bituma abaturage muri rusange babimenya, bakamenya uko birinda ruswa ndetse bakamenya n’ingaruka byabagiraho igihe hari abishoboye muri ruswa.

Yakomeje agira ati: “Twaje gusanga aya mahugurwa yaratumye hari n’abagira uruhare rwihariye mu kurwanya ruswa cyane cyane nko gutanga amakuru ku byaha bya ruswa. Izo ngamba zo gukumira, ni zo zirimo no gushyiraho izi komite zo kurwanya ruswa”.

Agaragaza ko urubyiruko na rwo rugomba kwinjizwa muri gahunda zo kurwanya ruswa kuko ari rwo ruzaba abayobozi mu gihe kiri imbere. Ati: “Rutari muri izo gahunda ntabwo byazaramba”. 

Uretse n’urubyiruko, Urwego rw’Umuvunyi rushaka ko n’abana bakura bazi ikizira ku Munyarwanda, icyiza n’ikibi kandi bagasobanukirwa uruhare bagira mu kurwanya ruswa.

Yagize ati: “Iyo bazamutse bakurira mu muco mwiza wo gukumira no kurwanya ikibi, noneho iyo bigeze kuri ruswa uruhare rwabo ruba runini kandi rugatanga umusaruro”.

Urwego rw’Umuvunyi rusaba abagize komite zo kurwanya ruswa gusobanukirwa inshingano zabo no gufasha ubuyobozi bw’ikigo bakoreramo, yaba mu gushyiraho ingamba ndetse no kuzitangira raporo.

Yanditswe na KAYITARE Jean Paul

  • Imvaho Nshya
  • Nyakanga 10, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE