Umuti usharira: Impamvu abangavu basabirwa kuboneza urubyaro

  • NTAWITONDA JEAN CLAUDE
  • Ukwakira 18, 2022
  • Hashize imyaka 2
Image

Icyemezo cyafashwe n’Inteko Rusange y’Umutwe w’Abadepite, mu Nteko Ishinga Amategeko y’u Rwanda, gikomeje gutangwaho ibitekerezo bitandukanye ku mbuga nkoranyambaga aho umubare munini wemeza ko kwanga gutora umushinga wemerera abangavu serivisi zo kuboneza urubyaro ari ukubarinda kwishora mu busambanyi bitera ingaruka zirenze gutwara inda.

Ku rundi ruhande ariko, hari abashyigikiye uwo mushinga kuko waba igisubizo ku nda ziterwa abangavu zikomeje kwiyongera, aho kuri ubu buri mwaka haboneka abangavu basaga 20,000 batewe inda batifuza, ikibazo kikaba cyiyongera nyamara ababona ikibazo mu gutanga izo serivisi ku bazishaka bibagoye kugaragaza undi muti urambye.

Ku wa Mbere ni bwo Inteko Rusange yanze kwemeza ishingiro ry’umushinga w’itegeko rihindura itegeko rya 2016 ryerekeye ubuzima bw’imyororokere y’abantu, uteganya ko abana b’abangavu bafite imyaka 15 y’amavuko bemererwa guhabwa serivisi zo kuboneza urubyaro.

Mu mpaka z’urudaca zafashe umwanya munini mu Nteko, Abadepite bagaragaza ko hagikenewe ibiganiro n’ibyiciro binyuranye by’Abanyarwanda n’imiryango ishingiye ku myemerere, mu kunonosora uwo mushinga ari na yo mpamvu wahise usubizwa itsinda ry’Abadepite bawutangije.

Inteko Rusange y’Abadepite yanze gutora uwo mushinga mu gihe amategeko y’u Rwanda yemera ko umuntu utaruzuza imyaka 18 y’amavuko wese aba ataragera ku myaka y’ubukure, bityo akaba atanabasha kwifatira icyemezo nk’icyo mu gihe ahanini aba akirererwa mu muryango.

Itegeko No 21/2016 ryo ku wa 20/05/2016 ryerekeye Ubuzima bw’Imyororokere y’Abantu, ingingo ya 20 iteganya ko Leta, ibigo byayo, ibigo bifite ubuzima bw’imyororokere y’abantu mu nshingano zabyo n’abandi bafatanyabikorwa bifite inshingano zirimo gukangurira urubyiruko ibijyanye no kuboneza urubyaro.

Gusa kugeza ubu ntabwo izo serivisi zemerewe gutangwa ku bana bari munsi y’imyaka 18 ari na yo mpamvu itsinda ry’Abadepite batanu ryagejeje ku Nteko Rusange uwo mushinga uvugurura iryo tegeko ryo mu 2016.

Abo badepite Dr. Gamaliel Mbonimana ari na we uyoboye itsinda, Speciose Ayinkamiye umwungirije, Eugene Mussolini, Alice Muzana, na Phoebe Kanyange.

Abadepite 18 muri 42 bitabiriye Inteko Rusange batoye bemeza ko uwo mushinga ukwiye gukomeza, mu gihe 30 bo banze kuwutora na ho bane bakifata, birangira ubwiganze bw’amajwi butsinze.

Impamvu z’ingenzi zishyirwa imbere n’iryo tsinda ry’Abadepite ryifuza ko abana b’abangavu b’imyaka 15 bahabwa uburenganzira kuri serivisi zo kuboneza urubyaro, zirimo kugabanya inda zitateguwe zikomeje kuba ikibazo gikomeje ku bangavu bo Rwanda rw’ejo.

Abanze gutora uwo mushinga na bo bavuga ko hashingiwe ku muco nyarwanda ndetse n’imyemerere, uwo mushinga waba ubangamira benshi ari na yo mpamvu basabye ko habanza kuganirizwa impande zitandukanye z’Abanyarwanda ndetse n’imiryango ishingiye ku myemerere kugira ngo ibitekerezo byabo bizashingirweho.

Gusa mu bihugu bitandukanye, serivisi zo kuboneza urubyaro ku bana bari hagati y’imyaka 15 na 19 y’amavuko zimaze imyaka myinshi zitangwa, kandi zigira uruhare rukomeye mu kugabanya ibyago byo kubona abana benshi baterwa inda batateguye, ibibazo byo gukuramo inda zikabahitana n’ibindi.

Muri ibyo bihugu harimo nka Jamaica yo ihera ku myaka 10, ndetse na Leta enye gusa muri 50 zigize Leta Zunze Ubumwe z’Amerika ni zo zitaratora itegeko na rimwe riha uburenganzira abana bato kuri serivisi z’ubuzima bw’imyororokere.

Bamwe mu bavuganye n’itangazamakuru, bagaragaje ko no mu Rwanda hagaragara ikibazo gikomeye cy’inda ziterwa abana b’abangavu, ariko kugikemura bikwiye gushingira ku kirebera mu byuho biri mu muryango nyarwanda aho kugifata nk’ikibazo cy’umwangavu watwaye inda.

Uwitwa Kagabo Jean Damascene yagize ati: “Ikibazo gihari kirarebana n’uburere, kubera ko bamwe mu babyeyi bataye inshingano zo kuganiriza abana babo ku buzima bw’imyororokere bakiri bato. None se abo banyabyaha bajye babikora ntibakurikiranwe kubera ko umwana wasambanyijwe atatewe inda? Ibi ni nko guha urwaho abagizi ba nabi nk’abo ngo bakomeze gusambanya abana bacu.”

Hari n’abandi bakomeje kugaragaza ko mu gihe iryo tegeko ryemejwe mu Rwanda bishobora guteza ibibazo by’ubwumvikane buke bukomeye mu muryango, kuko abana batangira gusuzugura inama z’ababyeyi babo bumva ko bemerewe gukora ibyo bashaka byose mu mategeko.

Abandi bavuga ko gutwara inda ari imwe mu ngaruka zihita zigaragara, ariko abangavu bakora imibonano mpuzabitsina bumva ko birinze inda bashobora kuba icyuho cy’indwara zandurira mu mibonano mpuzabitsina zirimo na Visuri Itera SIDA.

Depite Dr. Mbonimana we avuga ko bateguye uyu mushinga nyuma yo kubona ko ikibazo cy’inda  ziterwa abangavu gifata intera buri mwaka, aho mu mwaka ushize wonyine abarenga 23,000 bazitewe.

Indi mpamvu ashingiraho ni uko politiki yo kuboneza urubyaro iteganya ko ku myaka 15 yo myaka shingiro umwana akwiye gutangira kubona serivisi zijyanye n’ubuzima bw’imyororokere zirimo no kuboneza urubyaro.

Ati: “Icyo twari tugamije kwari uguhuza Politiki y’Igihugu n’itegeko.  Izo ni zo ngingo twashingiyeho mu guteganya ko abana b’imyaka 15 batangira guhabwa serivisi zo kuboneza urubyaro bitabaye ngombwa ko baherekezwa n’ababyeyi babo, cyane ko hari ibihugu bimwe na bimwe byemera ko n’abari munsi y’iyo myaka bazihabwa, ku myaka 12 na 13.”

Politiki y’Igihugu yo kuboneza urubyaro na Gahunda yo kunoza Ubuzima bw’imyororokere bw’ingimbi n’abangavu (2018-2024), iteganya ko mu kongera umubare w’abafata serivisi zo kuboneza urubyaro, u Rwanda rugomba gushaka ingamba zitandukanye zituma abazibona biyongera mu kuzigeza ku bakimara kubyara, abagore batarashyingirwa, ingimbi n’abangavu bakunda gukora imibonano mpuzabitsina, urubyiruko rutarashaka ndetse by’umwihariko hakarebwa uko icyiciro kiri mu myaka 15 na 19 cyakwitabwaho.

Depite Dr. Mbonimana yavuze ko itsinda ayoboye rigiye kwibanda ku nama zatanzwe n’Inteko Rusange, harimo no gukomeza gusanga abagenerwabikorwa barimo imiryango ishingiye ku myemerere, ababyeyi n’Abanyarwanda muri rusange, kugira ngo bafite icyemezo gishingiye ku bitekerezo byabo.

Ati: “Uyu mushinga tuzawunoza twongere tuwugarure imbere y’Inteko Rusange kugira ngo iwusuzume.”

  • NTAWITONDA JEAN CLAUDE
  • Ukwakira 18, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE