Umujyi wa Kigali wasabye abatuye i Kanyinya kudasesagura (Amafoto)

Urujeni Martine, Umuyobozi w’Umujyi wa Kigali wungirije ushinzwe Imibereho myiza n’Iterambere ry’ubukungu, yasabye abaturage bo mu Murenge wa Kanyinya kudasesagura.

Yabigarutseho ejo ku wa Gatanu tariki 04 Kanama 2023, ubwo hizihizwaga umunsi w’umuganura wabereye mu Kagari ka Taba mu Murenge wa Kanyinya ari naho wabereye ku rwego rw’Akarere ka Nyarugenge.

Ni ibirori byitabiriwe n’Umuyobozi Nshingwabikorwa wa Nyarugenge, Ngabonziza Emmy, inzego z’umutekano, abagize Inama Njyanama mu Karere ka Nyarugenge no mu Murenge wa Kanyinya.

Ubuyobozi bw’Umujyi wa Kigali bwasabye abitabiriye umunsi w’umuganura kuganuza bagenzi babo batashoboye kweza ariko bakirinda gusesagura.

Urujeni yagize ati “Twibuke abaturanyi bacu n’abavandimwe batabashije kubona umusaruro ushimishije maze tubasangize ku byo dufite kandi twirinde gusesagura”.

Yibukije abaturage kuganiriza abana babo bakamenya ko umuco ari wo soko bavomamo ibyiza igihugu cyagezeho.

Ngabonziza Emmy, Umuyobozi Nshingwabikorwa w’Akarere ka Nyarugenge, yashimiye abaturage ku gikorwa cyiza cyo kuganuza bagenzi babo.

Ashima kandi ko abadafite ubwisungane mu kwivuza na bo bishyuriwe ku buryo aka Kagari ka Taba kageze ku 100%.

Yabasabye gukomeza guharanira ubumwe bwabo bakarwanya icyo ari cyo cyose cyabatandukanya.

Ni umuganura waranzwe no kuganuza abaturage bafite amikoro make cyangwa batashoboye kugira umusaruro mwiza aho bahawe ibiribwa, amata n’ibindi.

Itorero ry’Umujyi wa Kigali Indatirwabahizi ryasusurukije abitabiriye umuganura.

Yanditswe na KAYITARE JEAN PAUL