Kigali mu mijyi 25 y’indashyikirwa mu kubungabunga ibishanga

  • NTAWITONDA JEAN CLAUDE
  • Ugushyingo 11, 2022
  • Hashize umwaka 1
Image

Ku wa Kane, i Geneva mu Busuwisi, Umujyi wa Kigali wahawe igihembo kiwemerera kuba mu mijyi 25 mishya y’indashyikirwa ku Isi mu birebana no kubungabunga ibishanga. 

Icyo gihembo cyakiriwe n’Ambasade y’u Rwanda i Geneva, Umujyi wa Kigali ugihawe kubera ingamba zihariye wafashe mu kubungabunga ibishanga by’umujyi no kubibyaza umusaruro mu nyungu z’abawutuye. 

Mu nana Mpuzamahanga y’Umuryango w’Abibumbye yiga ku  kubungabunga ibishanga ku nshuro ya 14 (COP14) yabereye i Geneva, Ubunyamabanga Bukuru bwashimiye Umujyi wa Kigali n’indi mijyi yahawe ibihembo ku ntambwe ishimishije yateye. 

Imijyi yahawe ibyo bihembo ibona icyubahiro mpuzamahanga ndetse ikinjira mu Ihuriro ry’Imjjyi y’Intangarugero mu kubungabunga ibishanga kugira ngo na yo ikomeze kwigisha amahanga uburyo bwo kurinda no kubungabunga n’ibindi bishanga. 

Gahunda yo kubungabunga ibishanga byo mu Mujyi wa Kigali ijyanye na gahunda yagutse ya Leta y’u Rwanda ijyanye no kubungabunga ibishanga mu rwego rwo gusigasira umutungo w’amazi n’urusobe rw’ibinyabuzima bicumbikira. 

Zimwe mu ngamba zafashwe mu Mujyi wa Kugali zari izo kwimura ibikorwa bya muntu byose byubatswe mu bishanga, harimo no guha ingurane abaturage bari bafite ibyangombwa by’ubutaka bwo mu bishanga. 

Ikintu cy’ingenzi cyagezweho ni icyo gutunganya igishanga cya Nyandungu mu Mujiyi wa Kigali, mu buryo bufasha guhangana n’imihindagurikire y’ikirere kandi bubereye ubukerarugendo, cyashyizwe mu bikorwa n’Ikigo cy’Igihugu gishinzwe Kubungabunga Ibidukikije (REMA) nyuma y’ishoramari ryakozwe n’Ikigega cy’Ibidukikije mu Rwanda  – FONERWA (Rwanda Green Fund), Ishami ry’Umuryango w’Abibumbye ryita ku Bidukikije (UN Environment) na Leta y’u Butaliyani.

Iki cyanya cya Nyandungu kiri kuri hegitari 120 kikaba kirimo ibikorwa bitandukanye nk’ibyuzi bikozwe mu buryo bw’umutako, amashyamba atewe mu buryo bubereye ijisho, ubusitani burimo ibihingwa byifashishwa mu buvuzi, uduhanda tw’abanyamaguru dushashe neza ndetse n’inzira z’amagare, resitora, ishakiro ry’amakuru ndetse n’ahagenewe izindi serivisi zijyanye no kuruhuka.

Uyu mushinga ntiwateguriwe gutanga inyungu z’ubusabane n’ubukungu gusa, ahubwo unashyigikira uburyo bushya bwo gusubiranya no kubungabunga urusobe rw’ibinyabuzima rubarizwa mu bishanga, bikajyana no kwimakaza imicungire irambye y’umutungo kamere.

Ministeri y’Ibidukikije ivuga ko hari ibindi bishanga 5 bigiye gutunganywa kugira ngo Umujyi wa Kigali ukomeze kugira isura nziza ariko irengera ibidukikije, ari na ko abantu barushaho kugira ahantu henshi ho kuruhukira.

Imishinga minini yo kongera gusana ibishanga irimo icyiciro cya kabiri cy’Umushinga wo Guteza Imbere Imijyi (RUDPII), uwo gushyira mu byiciro ibishanga byose no kwimura inganda zabarizwaga mu cyanya cyahariwe inganda cyari mu gishanga i Gikondo zerekezwa i Masoro mu kindi cyanya aho zibereye kuba.

  • NTAWITONDA JEAN CLAUDE
  • Ugushyingo 11, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE