Umugaba Mukuru w’Ingabo za Kenya yasuye Ibirindiro by’Ingabo z’u Rwanda

  • NTAWITONDA JEAN CLAUDE
  • Kamena 27, 2023
  • Hashize amezi 11
Image

Kuri uyu wa Kabiri taliki ya 27 Kamena, Minisitiri w’Ingabo wa Kenya Gen. Francis Ogolla uri mu ruzinduko mu Rwanda, yasuye Ibirindiro Bikuru by’Ingabo z’u Rwanda (RDF). 

Gen. Ogolla yakiriwe na Lt. Gen. Mubarakh Muganga, Umugaba Mukuru w’Ingabo z’u Rwanda, bagirana ibiganiro byibanze ku kurushaho kunoza umubano urangwa hagati y’Ingabo z’ibihugu byombi. 

Uyu munsi kandi akiri ku Birindiro Bikuru ku Kimihurura, Gen. Francis Ogolla yasuye Minisitiri w’Ingabo Juvénal Marizamunda.

Nyuma y’uru ruzinduko, Gen. Ogolla yavuze ko yaje mu Rwanda nk’umwe mu bitabiriye Imyitozo ya gisirikare ihuza Ingabo, Polisi n’abasivili baturutse mu bihugu bigize Umuryango w’Afurika y’Iburasirazuba (EAC) Ushirikiano Imara (CPX), yasoje ku wa Mbere taliki ya 26 Kamena.

Yavuze kandi ko mu minsi amaze mu Rwanda yabonye ko bikwiye kubanza kugirana ibiganiro na mugenzi we, Umugaba Mukuru w’Ingabo z’u Rwanda mbere yo gusubira mu Gihugu cye. 

Ingabo z’u Rwanda n’iza Kenya bisanzwe bifitanye umubano umaze imyaka myinshi by’umwihariko mu bijyanye n’amahugurwa, guhanahana ubumenyi ndetse no mu zindi nzego z’umutekano.

Mu gitondo cy’uyu munsi, Umugaba Mukuru w’Ingabo za Kenya yanafashe umwanya wo gusura Urwibutso rwa Jenoside rwa Kigali, yunamira inzirakarengane zishwe muri Jenoside yakorewe Abatutsi mu 1994. 

  • NTAWITONDA JEAN CLAUDE
  • Kamena 27, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE