Uko u Rwanda rwari rumeze kuva taliki ya 04.07.1994, n’igihe gito cyakurikiyeho (Igice cya II)

  • KAYITARE JEAN PAUL
  • Werurwe 12, 2024
  • Hashize ukwezi 1
Image

Ibi ni ibitekerezo bwite by’umwanditsi Tito Rutaremera. Ni umuyobozi w’Urwego Ngishwanama rw’Inararibonye z’u Rwanda.

Insengero cyane cyane iza kiliziya Gatolika nk’igikoresho cya Jenoside.

Abakirisito n’abandi Banyarwanda, bahungiye muri za Kiliziya bazi ko ari ahantu hatagatifu; bahajya ari benshi cyane.

Abandi bahahungiraga benshi bazaga baje gupfana hamwe n’abandi cyangwa rimwe rimwe kwirwanaho hamwe n’abandi.

Abajenosideri bo bari bazi ko ari byiza ko kubicira hamwe byoroshye batagombye kujya kubahigira hirya no hino. Kera Rugira wa Aprosoma (Ishyaka rya Gitera) yavuze ko ujya gutwika imbagara arabanza akazirundarunda.

Abakonseye ba MRND na Hutu Power (nk’uw’i Zaza) babwiraga abatutsi bati: “Mujye muri kiliziya aho dushobora kubarindira kugeza igihe benewanyu bazazira” (Inkotanyi).

Abajenosideri birinze gushyira bariyeri ahajyaga kuri kiliziya kugira ngo abantu badatinya kujyayo.

[…] byari byoroshye kwicira abantu benshi mu nsengero cyangwa rimwe na rimwe mu mashuri.

Interahamwe zuriraga igisenge cy’insengero zigakuraho ibati cyangwa itegura zigateramo za gerenade mu bantu birunze mu nsengero cyangwa kiliziya hanyuma zikamanuka hamwe n’izindi bakinjira muri kiliziya kunogonora abakomeretse cyangwa abakiri bazima. Barangiza bagatera urusenda muri kiriziya kugira ngo nihagira uwitsamura bamunogonore.

Hari abapadiri n’abapasitori ariko bake cyane bahishaga abantu bakanabarengera. Urugero; Musenyeri Celestin muri Saint Paul , Nyakwigendera Padiri Bosco muri Mukarange n’abandi.

Hari abandi bapadiri n’abapasitori benshi batishe ariko bajyaga mu nama zo gutegura no gukora Jenoside; ikibi ntabwo bazaga ngo nibura baburire bagenzi babo bahigwaga ko bagomba gupfa.

Hari abandi babicanyi nka Padiri Seromba w’i Nyange watanze ibihumbi mirongo itatu (30.000 FRW) akabiha interahamwe yarifite Tractor, isenya kiliziya y’i Nyange yarimo abatutsi ibihumbi, ijya hejuru iranombanomba nta n’igufwa ryabonetse.

Ni uko insengero cyane cyane Kiriziya zabaye ibikoresho bya Jenoside.

Abanyarwanda bari muri zone turquoise

Zone turquoise ni zone yaremwe n’Abafaransa; barashukashutse UN […] ariko aba bashutswe ni uko bashatse gushukwa kuko bari bazi neza ko Abafaransa bari ku ruhande rw’abakora Jenoside.

Abasirikare b’Abafaransa bari bazi ko baje gufasha Leta y’abatabazi kurwanya RPF no kubuza Kigali gufatwa.

Abasirikari babo bagendera mu mitaka bagomba kugwa muri Kigali ni joro bagira ibyago basanga APR yafashe Kigali kandi n’ahandi hose aba ex-FAR barimo bahunga batagifite morale yo kurwana, Abafaransa bahindura ingamba zabo zo kurwana.

[…] barema zone turquoise aho bagomba kuzana za Ex-FAR bakazigisha bazizanira intwaro; bakazifasha kurwana ngo bazongere bafate ubutegetsi Kigali.

Uko baje guhindura ubutumwa (Mission)

Abafaransa bari baje gutanga umusanzu ku basirikare ba Ex-FAR bahura n’ingabo za APR ku rutare rwa Ndaba barwanaho gato; APR ibafataho imfungwa, ibambura intwaro. Ubufaransa kugira ngo bubone abantu babo bwemera kuva muri zone turquoise.

Icyo gihe mission (ubutumwa) isigara ari ugukusanya abasirikare batsinzwe, interahamwe, abaturage na Leta yatsinzwe babajyana muri Zaire n’intwaro n’ibintu byabo.

Mission iba kubakusanya ariko no kubategurira kubafashiriza muri Zaire gukuraho Leta ya RPF.

Muri icyo gihe Abafaransa bari muri zone turquoise Jenoside yakomeje gukorwa mu bice byarimo Abafaransa  kugira ngo biyererutse babone icyo bereka Isi.

Hari inkambi nk’ebyiri barinzemo abacitse ku icumi ariko muri izo nkambi iyo interahamwe zazaga gushakamo abantu barababahaga.

Ikindi kinini cy’agasuzuguro Abanyarwanda tutazibagirwa na rimwe ni uko Abafaransa i Murambi batabye mu byobo abatusti bari biciwe i Murambi bakabarenzaho igitaka barahakurungira, baratsindagira n’imashini [….] barahatunganya bahakora ikibuga cya volleyball bagakiniraho buri munsi kandi bazi neza ko babyinira hejuru y’imirambo yabo babeshye ko baje gutabara.

Ikindi tutazibagirwa ni uko babeshye aba Bisesero birwanagaho bakava mu mashyamba barwaniragaho bihishemo bababwira ko bahumure bazagaruka; baragenda interahamwe zibadukamo zirabamara.

Abantu bari muri zone tampon

Zone tampon; ni zone yavutse ubwo RPF yateraga ikagera za Shyorongi igasubira inyuma; iyo zone yari zone Tampon yari igizwe n’amakomini amwe yo mu Mutara, Byumba na Ruhengeri. (Iyo zone tuzababwira uko yaremwe).

Abaturage bari muri aka gace bagize Imana; RPF ihagera kare nta Jenoside ikomeye yahabaye. Abantu bari bafite ibyo kurya kuko bari mu nzu zabo ariko nta bucuruzi nta mashuri yari ahari; ibindi n’imiti byatangwaga na RPF. Aha umutekano w’abantu n’ibintu byahageze kare.

Abantu bari muri zone RPF yabohoje kera

Muri aka gace karimo umutekano n’ubucuruzi bukorwa, amashuri abanza yaratangiye ndetse n’amashuri y’imyuga. Ahantu nka Gishambashayo.

Abagabo n’abagore bo muri ako gace bari baraje muri RPF, urubyiruko rwaragiye mu bakada no mu gisikirikare cya APR, bari bafite umutekano wabo n’uw’ibintu byabo.

Zone yarimo impunzi za kera

Impunzi zahunze kera muri 1959; zaraje zitura mu bice bya Ngarama, zizana umutekano ubucuruzi, zizana amashuri ubuzima buratangira ndetse n’ubukungu butangira muri icyo gice cyane cyane ubucuruzi n’ibindi bihugu, […] izo nizo zabanjirije abandi ariko nyuma yaho haje izindi mpunzi zose zo muri 1959 zagiye ziza buhoro buhoro; zitura muri Byumba na Mutara, izivuye Tanzania ziza zitura Kirehe , Kibungo ( Ngoma), izivuye Burundi ziza zitura Bugesera no mu Mayaga.

Abavuye muri Zaire baje batura muri Rubavu, Ruhengeri muri Kibuye na Cyangugu abandi bagenda baza Kigali buhoro buhoro zikwira mu Rwanda hose.

Mu gihe gitaha tuzaganira icyo izo mpunzi zazanye mu Rwanda; umutekano n’ubukungu cyane cyane muri Kigali.

  • KAYITARE JEAN PAUL
  • Werurwe 12, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE