Ubukangurambaga bwa Gerayo Amahoro burakomeje mu Rwanda 

  • Imvaho Nshya
  • Gicurasi 24, 2023
  • Hashize umwaka 1
Image

Polisi y’u Rwanda, ku wa Kabiri taliki 23 Gicurasi, yakomereje ubukangurambaga bw’umutekano wo mu muhanda ‘Gerayo Amahoro’ mu Nteko z’Abaturage mu gihugu hose.

Ni nyuma y’aho mu ntangiriro z’iki cyumweru ubwo bukangurambaga bwakorewe mu mashuri abanza n’ayisumbuye, aho amashuri agera ku 122 yo mu Turere dutandukanye tw’Igihugu yagejejweho ubutumwa bwo kwirinda impanuka.

Gerayo Amahoro ikomeje gushyirwamo imbaraga mu rwego rwo gushishikariza buri wese gufata ingamba zo kurushaho kwirinda impanuka zihitana ubuzima mu mihanda.

Abaturage basanzwe mu Midugudu, mu Nteko bagira buri cyumweru, bibutswa inshingano zabo nk’abakoresha umuhanda mu ngendo bagira umunsi ku munsi.

Basobanuriwe amategeko agenga umuhanda n’uburyo bwo kuwugendamo, basabwa kubahiriza amabwiriza n’ibyapa byo mu muhanda, atari ukubera amategeko ahubwo ari amahitamo yabo kugira ngo bagere aho bajya amahoro.

Umuvugizi wa Polisi y’u Rwanda, Commissioner of Police (CP) John Bosco Kabera yavuze ko intego y’Ubukangurambaga ari ugusigasira umutekano wo mu muhanda kandi ko uruhare rwa buri wese rukenewe kugira ngo bigerweho.

Yagize ati: “Intego y’ubukangurambaga bwa Gerayo Amahoro ni ukugeza ubutumwa bw’umutekano wo mu muhanda kuri buri wese uwukoresha.”

Yakomeje agira ati: “Abashoferi, abagenzi, abamotari, abatwara amagare n’abanyamaguru; bose baba mu baturage. Bagomba kumenya ko bafite uruhare mu kubungabunga umutekano wo mu muhanda kuko impanuka nyinshi zibaho bitewe n’uburangare bw’abakoresha umuhanda.”

Yongeyeho ko umutekano wo mu muhanda ugomba kuba inshingano za buri wese, ari nayo mpamvu ubutumwa bw’umutekano wo mu muhanda butangwa kuri bose kugira ngo hatagira umuntu n’umwe usigara.

“Buri wese ukoresha umuhanda agomba gusobanukirwa amategeko y’umuhanda n’uko agomba kwitwara igihe awukoresha ku bw’umutekano we bwite ndetse n’uw’abandi bawuhuriramo.”

Abanyamaguru, abamotari n’abatwara amagare bari mu bakunze kwibasirwa n’impanuka zo mu muhanda.

CP Kabera yabagaragarije imyitwarire idahwitse y’abakoresha umuhanda, ikunze guteza impanuka zihitana ubuzima nko kugendera mu gisate cy’umuhanda kitari cyo, kwambuka umuhanda utabanje gushishoza, gutwara ikinyabiziga wanyoye ibisindisha, kunyuraniraho ahatemewe n’andi makosa atandukanye.

Bamwe mu bitabiriye ubukangurambaga bwa Gerayo Amahoro mu nteko z’abaturage zitandukanye, bashimye imbaraga  Polisi ishyira mu kwigisha abagize ibyiciro byose by’abakoresha umuhanda mu gihugu hose,  ibashishikariza kugira umuco wo kwirinda impanuka.

Munyankindi Jeannine utuye mu murenge wa Muhima mu Karere ka Nyarugenge yavuze ko buri wese ukoresha umuhanda aramutse asobanukiwe uruhare rwe nk’umunyamaguru, umunyonzi n’utwara ikinyabiziga, byatuma umuhanda ugira umutekano buri wese akawukoresha nta nkomyi.

Yagize ati: “Aya ni amahirwe twagize yo kwigishwa n’ abapolisi mu nteko rusange. Twaganirijwe ku ngingo zitandukanye z’uburyo twakwitwara mu gihe dukoresha umuhanda, dusobanurirwa amategeko n’amabwiriza agenga umuhanda tutari tuzi cyane nk’abanyamaguru.

Yasabye ababyeyi bagenzi be kutareka abana ngo bajye mu muhanda nta muntu mukuru bari kumwe, abasaba kujya bahozaho kubibutsa uko bakwitwara birinda impanuka mu gihe bava cyangwa bajya ku mashuri. 

Kimwe na mugenzi we Muhire Pierre, yashimiye Polisi ku bw’ubukangurambaga, avuga ko bajyaga bambuka umuhanda uko biboneye batabanje kureba ahabigenewe byashoboraga guteza impanuka, avuga ko bagiye guhindura uko bitwaraga kandi bita ku byapa byo mu muhanda nk’uko babisobanuriwe.

  • Imvaho Nshya
  • Gicurasi 24, 2023
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE