U Rwanda rwizihije Umunsi w’Ubwitange hashimwa ibikorwa by’urubyiruko

  • NTAWITONDA JEAN CLAUDE
  • Ukuboza 5, 2022
  • Hashize umwaka 1
Image

Uyu munsi ku wa 5 Ukuboza 2022, u Rwanda rwizihije Umunsi Mpuzamahanga w’Ubwitange n’Ubukorerabushake, hashimwa uruhare urubyiruko rugira mu bikorwa bigamije iterambere ry’Igihugu binyuze mu bukorerabushake.

Kwizihiza uyu munsi ku rwego rw’Igihugu byabereye mu Karere ka Gicumbi, mu Ntara y’Amajyaruguru, byaranzwe n’ibikorwa bitandukanye, birimo gusura imirima y’icyayi y’urubyiruko rw’abakorerabushake rwo muri aka karere, gushyira ibuye ry’ifatizo inzu y’Inama y’Igihugu y’Urubyiruko no guha amabati umukecuru utishoboye.

Munezero Clarisse Umunyamabanga Uhoraho muri Minisiteri y’Ubumwe bw’Abanyarwanda n’Inshingano Mboneragihugu  (MINUBUMWE), yavuze ko kwizihiza uyu munsi ari umwanya mwiza wo kongera kuzirikana, gutekereza no gushimira abakorerabushake batandukanye bagira uruhare mu ishyirwa mu bikorwa rya gahunda zitandukanye zigamije iterambere ry’u Rwanda.

Yagarutse k’ubwitange nk’indangagaciro iranga umuco w’Abanyarwanda, anerekana ko ari bwo bwatumye Igihugu cyubakwa, kuva cyahangwa.

Yongeyeho ko ari  ho hagaragara  indangagaciro y’ ubumwe, ubufatanye, urukundo, gukorera ku gihe, kugira intego n’ umurimo unoze.

Munezero yagize ati: “Ku muntu ukorera ubushake, nta gihembo kiruta kubona uwari ubabaye yishimye, anyuzwe n’imirimo myiza wamukoreye. Mu bikorwa mwakoze, mwubakiye abatishoboye amazu, uturima tw’igikoni; by’umwihariko mwatangiye gukoresha ikoranabuhanga mu kurwanya ingengabitekerezo ya Jenoside.”

Kubana Richard Umuyobozi Mukuru ushinzwe ibikorwa by’Urubyiruko rw’Abakorerabushake muri Minisiteri y’Ubutegetsi bw’Igihugu, yahamagariye buri wese kwitabira ibikorwa by’ubukorerabishake agira ati: “Ibikorwa by’ubukorerabushake ntabwo bireba abantu bamwe kandi ntabwo bisaba ibya mirenge, ahubwo bisaba urukundo n’ubwitange”.

Guverineri w’Intara y’Amajyaruguru Nyirarugero Dancille  yibukije Urubyiruko rw’Abakorerabushake ko ejo hazaza h’Igihugu hashingiye kuri rwo, bityo ko rugomba gusigasira ibyagezweho no kubyubakiraho rukagiteza imbere, rukarangwa kandi no kugira imyitwarire myiza.

Yanarusabye kongeramo imbaraga mu bikorwa  birimo iby’isuku, kurwanya igwingira n’imirire mibi mu bana bato, kurwanya ibiyobyabwenge mu rubyiruko, gufasha abaturage batagira amacumbi kuyabona, kugarura mu ishuri abana baritaye, n’ibindi.

Insanganyamatsiko y’uyu mwaka  igira iti: “Ubufatanye binyuze mu bukorerabushake”.

Guverineri w’Intara y’Amajyaruguru Nyirarugero Dancille
Munezero Clarisse Umunyamabanga Uhoraho muri MINUBUMWE
  • NTAWITONDA JEAN CLAUDE
  • Ukuboza 5, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE