U Rwanda rwiyemeje guharanira imikorere myiza ya AMA

  • NTAWITONDA JEAN CLAUDE
  • Kamena 20, 2023
  • Hashize amezi 11
Image

Guverinoma y’u Rwanda yongeye gushimangira gukora ibishoboka byose Ikigo Nyafurika Gishinzwe Ubuziranenge bw’Imiti (AMA) kigakorera mu kirere cyiza, mu rugendo rwo guharanira gukorera imiti n’inkingo byujuje ubuziranenge ku mugabane w’Afurika. 

Minisitiri w’Ubuzima Dr. Nsanzimana Sabin, yabigarutseho ku wa Mbere taliki ya 19 Kamena, ubwo hafungurwaga ku mugaragaro Inama y’iminsi Ibiri y’Ikigo Nyafurika gishinzwe Ubuziranenge bw’Imiti.

Iyi nama ibereye i Kigali mu gihe u Rwanda ari rwo rwahawe kwakira Icyicaro gikuru cya AMA, nk’ikigo kizajya gikora ubugenzuzi bw’imiti, inkingo n’ibindi bikoresho by’ubuvuzi bikorerwa ku mugabane w’Afurika ku buryo bibasha guhiganwa n’ibikorerwa ku yindi migabane. 

Icyo kigo cyitezweho kwihutisha ibikorwa bihuriweho mu rwego rw’Afurika mu byo gukora imiti, kuyikwirakwiza, kumenya no gukurikirana ko n’ubushakashatsi ku miti bukorwa neza.

Iyo nama ibaye ku nshuro ya kabiri yateguwe na Komisiyo y’Umuryango w’Afurika Yunze Ubumwe (AUC) ifatanyije na Guverinoma y’u Rwanda, hagamijwe kwihutisha imikorere ya AMA. 

Ubuyobozi bw’Umuryango w’Afurika Yunze Ubumwe bwahamagariye ibihugu byashyize umukono ku ishyirwaho ry’icyo kigo,  kwihutira gutanga imisanzu yabyo mu gushyigikira ko gitangira gukora byihuse, by’umwihariko muri ibi bihe ibihugu by’Afurika birimo n’u Rwanda birimo kubaka inganda zikora imiti n’inkingo. 

Komiseri ushinzwe ubuzima, Ibikorwa by’ubutabazi n’iterambere ry’imibereho myiza y’abaturage muri AU Amb. Minata Samate, yabigarutseho ashimangira ko ubufatanye ari wo musingi wo kugera ku ntego za AMA. 

Yagize ati: “Ntidushobora kubaka Afurika twifuza tudafite Abanyafurika bafite amagara mazima.“

Amb. Samate yakomeje avuga ko nubwo iki kigo kizakenera inkunga y’abandi bafatanyabikorwa, ibihugu by’Afurika ari byo muterankunga wa mbere w’iki kigo, bityo bigomba gufata iya mbere bigatanga amafaranga gikeneye kugira ngo kibashe kuzuza inshingano zacyo.

Yagize ati: “Kugira ngo iki Kigo kibashe gukora dukeneye amafaranga kandi menshi. Turakora ibishoboka byose rero ngo tuyakure imbere muri Afurika ndetse no hanze yayo ariko mbere na mbere imbere muri Afurika ni ho duhanze amaso.

Reka mpamagarire ibihugu byashyize umukono ku masezerano ashyiraho AMA kongera imbaraga kuko icyorezo cya COVID19 cyatweretse ko mbere na mbere ari twebwe ubwacu tugomba kwikemurira ibibazo.”

Yakomeje ashimangira ko byarushaho kuba byiza inkunga ikusanywa n’Abanyafurika ari yo yaba nyinshi kurusha iy’abaterankunga bo hanze, kugira ngo batazabyuririraho bagashaka kuyobora icyo kigo kigomba gukorera Abanyafurika mu nyungu z’Afurika. 

Ati: “Mu muco w’iwacu tuvuga ko ukuboko kwakira guhora munsi y’ugutanga, naho ukuboko gutanga kugahora hejuru. Amafaranga y’abandi rero naba menshi kurusha ayacu bazadutegeka ibyo dukora bitubuze kugera ku ntego zacu.”

Yavuze ko kugira ngo ubwo bushobozi bukenewe muri Afurika buboneke, Leta zizafatanya n’abikorera kuko na bo badashobora kwikorera mu gihe abaturage badafite ubuzima buzira umuze.

  • NTAWITONDA JEAN CLAUDE
  • Kamena 20, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE