U Rwanda rwiteguye kurushaho kubyaza umusaruro za ‘drones’

29 Ugushyingo 2023 Saa 13:34

Yanditswe na Ntawitonda Jean Claude Ku ya 29 Ugushyingo 2023 Saa 13:34 Iminota 2 yo gusoma

U Rwanda rwiteguye kurushaho kubyaza umusaruro za ‘drones’ — Three unmanned aerial systems (UAS) soar in the sky, Aug. 21, 2019 at Edwards Air Force Base, California. Members assigned to the Emerging Technology Combined Test Force (ETCTF), an organization with the Air Force Test Center, focus on testing and developing UAS technology. The ETCTF gathers and analyzes UAS data to enhance security and effectiveness for service members. (U.S. Air Force photo by Staff Sgt. Rachel Simones)

Guverinoma y’u Rwanda yatangiye kureba ku mahirwe atandukanye ajyanye no kurushaho kubyaza umusaruro ikoreshwa ry’indege nto zitagira abapilote (drones) mu rwego rwo guharanira iterambere rigendanye n’ibyo u Rwanda rwiyemeje mu kwimakaza ikoranabuhanga rigezweho.

Ni mu gihe indege nto zitagira abapilote zikomeje kubonwa nk’umufasha ukomeye mu mitangire ya serivisi mu nzego zinyuranye uhereye ku rw’ubuzima, umutekano, ibidukikije, ubuhinzi n’ubworozi, umutekano, n’izindi.

Mu mwaka wa 2016 ni bwo indege nto zitagira abapilote zatangiye kwandika amateka akomeye mu Rwanda, zitwara amaraso yo gutabara indembe mu bitaro bitandukanye byo mu gihugu birimo n’ibiherereye ahantu hagoranye kugera hifashishijwe inzira y’ubutaka.

Nyuma y’imyaka mike drones zifashishijwe mu rugamba rwo guhangana na COVID-19, zifashishwa mu kugeza intanga ku borozi batandukanye mu gihugu, mu bikorwa byo kurwanya malariya aho zifashishwa mu gutera imiti mu bishanga, gusuzuma imiterere y’ubutaka no gutera imiti mu myaka n’ibindi.

Muri uku kwezi, Minisitiri w’Ibidukikije Dr Mujawamariya Jeanne d’Arc, yatangarije Abasenateri ko izo drones zigiye kwifashishwa mu kugenzura abangiza ibidukikije.

Mu nama iteraniye i Kigali kuri uyu wa Gatatu tariki ya 29 Ugushyingo, yiga ku kuteza imbere uruhererekane rw’imikoreshereze ya drones mu Rwanda, Ingabire M. Paula Minisitiri w’Ikoranabuhanga no guhanga Ibishya, yavuze ko abafatanyabikorwa batandukanye bahujwe no gutanga ibitegekerezo byo kurushaho kwimakaza ikoreshwa rya drones mu Rwanda.

Yagize ati: “Uyu munsi ntabwo ari ibirori gusa; ni uguhuza ibitekerezo kugira ngo u Rwanda ruhagarare neza kandi rube intangarugero ku Isi yose mu guteza imbere ikoreshwa rya drones no guhanga udushya. Reka twubake umwuka w’ubufatanye, guhanga udushya, ndetse no gufata inshingano.”

Minisitiri Ingabire M. Paula, yavuze ko ikoreshwa rya drone ari ingenzi cyane mu iterambere

Iyo nama yitabiriwe n’inzego zitandukanye z’abafatanyabikorwa mu iterambere ry’uruhererekane rw’indege nto zitagira abapilote, abo bafatanyabikorwa bakaba barimo kurebera hamwe uko barushaho kwagura imikoranire igamije kurushaho kwimakaza iterambere rya drones hubahirizwa intego z’u Rwanda mu iterambere ry’ikoranabuhanga.

Muri iyo nama kandi haramurikirwamo amahirwe anyuranye y’imikoranire muri urwo rwego ndetse na gahunda nshya z’imikoranire ishoboka mu gihe kizaza.

Ikoranabuhanga rya drone rikomeje gutera imbere muri iyi myaka aho rikoreshwa mu nzego zinyuranye zaba iza Leta n’iz’abikorera mu bikorwa birimo gufata amashusho, kugeza ibicuruzwa ku bakiliya, gukusanya amakuru mu rwego rw’umutekano n’imicungire y’ibiza, gukora ubushakashatsi, ubugenzuzi, ubwikorezi bw’ibicuruzwa n’ibindi bikoresho, kubahiriza amategeko, kwifashishwa mu iteganyagihe no kugenzura imipaka.

Drones zikomeje gufasha u Rwanda mu kurwanya Malaria

Bivugwa ko hari n’ubundi buryo bwinshi bukomeje gutegurwa kugira ngo bube bwakwifashishwa mu iterambere rya drones no kurushaho kuzibyaza umusaruro utanga inyungu zifatika ku baturage.

Ubushakashatsi bwagaragaje ko ubucuruzi bushingiye ku ikoreshwa rya drone ku Isi buzaba bwinjije miliyari zisaga 500 z’amadolari y’Amerika kugeza mu mwaka wa 2030.

Impuguke mu by’ikoranabuhanga zigaragaza ko nta gushidikanya ko drone zizaba umusemburo w’iterambere ry’ikoranabuhanga n’imitangire inoze ya serivi mu nzego zinyuranye.