U Rwanda rwiteguye kubyaza umusaruro isoko rya karubone

  • NTAWITONDA JEAN CLAUDE
  • Werurwe 1, 2023
  • Hashize umwaka 1
Image

Leta y’u Rwanda yatangiye kwigira ku bihugu bimaze gutera intambwe ku buryo bwo kubyaza umusaruro isoko rya karubone (carbon markets) rigurishirizwaho gahunda zo kugabanya ibyuka bihumanya ikirere hagamijwe guhangana n’imihindagurikire y’ibihe.

Minisitiri w’Ibidukikije Dr. Mujawamariya Jeanne d’Arc, yagaragaje ko u Rwanda rwitabiriye inama mpuzamahanga irebana n’amashyamba (One Forest Summit) iri kubera i Libreville muri Gabon, kugira ngo rwigire ku mikorere y’ibihugu birimo na Gabon ibijyanye no kubyaza umusaruro isoko rya karubone, ariko n’ibindi bihugu birwigireho intambwe nziza rwateye mu kubungabunga ibidukikije.

Mu kiganiro yagiranye n’Imvaho Nshya, Minisitiri Dr. Mujawamariya yagize ati: “Inama irebana n’amashyamba yateguwe ku bufatanye bw’Igihugu cya Gabon n’icy’u Bufaransa. Icyo tuzayungukiramo cyane cyane ni uko mu biganiro bizabera muri iyi nama harimo ikiganiro kigaruka ku buryo dushobora kungukira ku isoko rya karubone.”

Abenshi bakunze kwibaza uko iryo soko rikora kubera ko byumvikana nk’aho ari ugucuruza imyuka ihumanya ikirere, buri muntu atakwifuza kubonamo amahirwe, kuko iri mu byihutisha imihindagurikiye y’ibihe mu gihe nta mashyamba ahari yo kuyikogota ikayihinduramo umwuka muzima utuma abantu babaho batekanye.

Binyuze mu isoko rya karubone abantu ku giti cyabo n’imiryango itandukanye bahangayikishijwe n’ihindagurika ry’ibihe, bayoboka isoko rya karubone bakagura toni z’imyuka ihumanya yakuwe mu kirere (carbon dioxide/C02) binyuze mu gushyigikira imishinga yashyiriweho kuyigabanya mu bihugu bitandukanye byinjiye kuri iryo soko.

Igiciro gishingira ku kiguzi cy’ingaruka z’iyo myuka ihumanya ikirere ku buzima n’imibereho by’abaturage, ubushakashatsi bushya bukaba bugaragaza ko ingaruka za karubone ku Isi ziyihesha ikiguzi cy’impuzandengo y’amadolari y’Amerika 3 kuri toni.

Mu gihe Isi iteganya kugabanya nibura toni miliyari 80 z’ibyuka bya CO2 bihumanya ikirere bitarenze mu mwaka wa 2050 nk’uko biteganywa mu Masezerano y’i Paris, bivuze ko Isi izaba irengeye miliyari 240 z’amadolari y’Amerika.

Gushyira ikiguzi ku byuka bigabanywa mu kirere, bigira uruhare rukomeye mu gushyigikira imishinga yitezweho kugabanya ibyuka bihumanya ikirere ituruka mu bantu ikangiza ikirere. Iyo myuka ihumanya ikunze kwiyongera igihe abantu bakoresheje ingufu zituruka ku gutema amashyamba, izituruka ku bikomoka kuri peteroli, gukoresha amashanyarazi aturuka ku ngufu zitisubira cyangwa uburyo bwo gushyushya no gukonjesha bukoresha amakara, amavuta na gazi.

Minisitiri Dr. Mujawamariya yavuze ko u Rwanda rugeze kure rutegura gahunda y’Igihugu izagenga uburyo bwo gucuruza amashyamba butangiza n’ibindi bikorwa bibungabunga ibidukikije cyane cyane igihe ruzaba rugeze ku isoko rya karubone.

Ati: “Muri uku kwezi kwa Werurwe, tuzashyira hanze uko u Rwanda ruhagaze ku isoko rya karubone; ubu rero muri ibi biganiro tuzaboneraho kwigira ku bandi aho bageze ndetse n’abandi batwigireho bimwe mu byo tugenda duteramo imbere. Ariko by’umwihariko tuzaganira aho tugeze, cyane cyane ko igihugu cya Gabon gifite aho kigeze mu kugurisha imigabane yacyo ku isoko rya karubone.”

Yakomeje ashimangira ko u Rwanda rwishimira kwigira ku bandi kandi rukanashyira mu bikorwa ibyo rwigira ku bindi ibihugu, agira ati: “Turi abiga kandi twiga neza mu Rwanda, twigira ku bandi kugira ngo ibyo tubigiyeho natwe tugende tubikoresha iwacu mu Rwanda.”

Yavuze ko iyi nama y’iminsi ibiri ari n’amahirwe yo kurushaho kwagura abafatanyabikorwa ndetse no gutsura umubano n’abasanzwe bashyigikira u Rwanda mu rugamba rwo kubungabunga ibidukikije no guhangana n’imihindagurikire y’ibihe.

Minisitiri Dr. Mujawamariya avuga ko iyo nama yiga ku mashyamba ari ingirakamaro cyane kuko amashyamba ari ibidukikije bigira uruhare rukomeye mu mibereho myiza ya muntu.

Ati: “Kwangiza amashyamba bimaze kutugaragariza ko bigira ingaruka ku mihindagurikire y’ibihe, ubushyuhe bukabije, ngira ngo murabibona kuba n’ibihe by’ihinga iwacu byarahindutse. Ntitukigira icyi, ntitukivuga ngo uyu ni umuhindo, ibyo byose ni imihindagurikire y’ibihe. Hari ibyo ubushakashatsi bwatweretse, hari n’izindi ngaruka ubushakashatsi butaratwereka. Ni ngombwa rero ko buri Munyarwanda wese ashyiraho ake mu gutera amashyamba.”

Yashishikarije buri Munyarwanda kuva ku mwana utangiye amashuri y’inshuke kugeza ku mukecuru n’umusaza kugira uruhare mu gutera amashyamba, yibutsa ko ishyamba atari iry’inturusu gusa kuko umuntu ashobora gutera ibiti bimuha n’imbuto ziribwa nk’imyembe, avoka n’ibindi.

“[…] Buri Munyarwanda wese nahaguruke akore iyo bwabaga. Kubera ko guhera ku mwana uri mu mashuri y’inshuke ashobora gutera igiti kugira ngo ejo hazaza habe heza. Ejo abana n’abuzukuru bacu tuzabarage Igihugu cyiza kuko ntabwo turi ba Banyarwanda bavuga ngo umubyeyi gito akuraga ibyamunaniye. Nimureke twese igihugu cyoye kutunanira.”

Ingaruka z’imihindagurikire y’ibihe iterwa n’ubwiyongere bwa karubone mu kirere zirimo izamuka ry’amazi y’inyaja, ibiza bidasanzwe  nk’amapfa, imyuzure, ubushyuhe bukabije n’imvura ziremereye.

Ibyo byose bigira ingaruka ziremereye zijyanye n’urugendo rwo gusana ibyangiritse, imyaka ikarumba, ibura ry’amazi n’ibindi bigira ingaruka zikabije ku bihugu bikiri mu nzira y’amajyambere kandi ari byo byohereza mu kirere imyuka mike ihumanya ugereranyije n’ibihugu byateye imbere.

  • NTAWITONDA JEAN CLAUDE
  • Werurwe 1, 2023
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE