U Rwanda rwishimiye ko William Ruto yatorewe kuyobora Kenya

  • NTAWITONDA JEAN CLAUDE
  • Kanama 16, 2022
  • Hashize imyaka 2
Image

Leta y’u Rwanda yifatanyije n’iya Kenya kwishimira intsinzi yo kubona Perezida mushya William Ruto, uje gusimbura Uhuru Kenyatta wasoje manda ze ebyiri yari amaze nk’Umukuru w’icyo gihugu. 

Perezida wa Repubulika y’u Rwanda Paul Kagame yifatanyije na William Samoei Ruto kwishimira intsinzi nyuma yo gutorwa nka Perezida mushya wa Kenya.

Yagize ati: “Mu izina rya Guverinoma y’u Rwanda n’Abanyarwanda, nifurije kwishyuka basaza na bashiki bacu, Abanyakenya, bakoze amatora yaranzwe n’umutuzo ku ya 9 Kanama 2022. Nanone kandi ndifuriza kwishyuka Nyakubahwa Dr . William Samoei Ruto, Perezida watowe.”

Yakomeje avuga ko u Rwanda ruha agaciro gakomeye ubutwererane rufitanye n’Igihugu cya Kenya.

Minisiteri y’Ububanyi n’Amahanga n’Ubutwererane mu Rwanda, yandikiye iya Kenya iyimenyesha ko Guverinoma y’u Rwanda yifatanyije n’iya Kenya kwishimira ko amatora yabaye ku ya 9 Kanama yagenze neza. 

Ubwo butumwa buragira buti: “Guverinoma n’abaturage b’u Rwanda bifatanyije na Guverinoma n’abaturage ba Kenya kwishimira umusaruro w’amatora yo ku ya 9 Kanama 2022. Guverinoma kandi yifatanyije na Nyakubahwa William Samoel Ruto kwishimira kuba yatowe nka Perezida wa Repubulika ya Kenya.”

Guverinoma y’u Rwanda yavuze kandi ko iha agaciro gakomeye umubano ifitanye na Kenya, ari na yo mpamvu yafashe ayo mahirwe igashimangira ukwiyemeza kurushaho gusigasira ubushuti busanzwe hagati y’ibihugu byombi. 

Minisiteri y’Ububanyi n’Amahanga n’Ubutwererane y’u Rwanda yavuze ko yiteguye gukorana n’iya Kenya mu kuvugurura ibisabwa byose ngo umubano w’ibihugu byombi urusheho gusagamba. 

Komisiyo y’Igihugu y’Amatora muri Kenya ku wa Mbere yatangaje ko William Ruto yatsinze amatora  ku majwi 50.49%

Ni ukuvuga ko yarushije Raila Odinga bari bahanganye we yagize amajwi 48.5% kandi umukandida watsinze agomba kuba yujuje amajwi 50%. 

Mbere y’iminota mike yabanjirije gutangaza ibyavuye mu  matora, abakomiseri bane muri barindwi bavuze ko bitandukanyije n’ibigiye gutangazwa kuko habonetse ibikorwa by’umwijima mu cyiciro cya nyuma cyo kubarura amajwi. 

Abashyigikiye Raila Odinga bazindukiye mu myigaragambyo mu bice bitandukanye by’Igihugu, ariko Ruto yamaze kwemezwa nka Perezida. 

Gusa Kenya ifite amateka mu bijyanye n’imyigaragambyo ikunda kuba mu matora cyangwa nyuma yayo, aho iyo mu mwaka wa 2017 yahitanye abasaga 100 mu gihe mu 2007 bwo yari yahitanye abasaga 1,200. 

Muri uyu mwaka Komisiyo y’Igihugu y’Amatora yari yamaze gushimirwa ko yakemuye ibibazo byinshi byari mu kurwanya ibikorwa by’umwijima mu gihe cy’amatora, ariko nyuma yo gushimirwa ni bwo humvikanye abatishimiye ibyakozwe mu cyiciro cya nyuma cyo kubarura amajwi. 

  • NTAWITONDA JEAN CLAUDE
  • Kanama 16, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE