U Rwanda rwasimbuje abapolisi barwo boherejwe muri UNMISS

Kuri uyu wa Mbere taliki ya 7 Ugushyingo, Polisi y’u Rwanda yasimbuje abapolisi bari bagize itsinda rya RWAFPU-III bari bamaze igihe cy’umwaka mu butumwa bw’Umuryango w’Abibumbye bwo kubungabunga amahoro mu gihugu cya Sudani y’Epfo (UNMISS).

Iri tsinda rya FPU III-5 risimbuye irya FPU-III-4 ryakoreraga mu Murwa Mukuru w’icyo gihugu, Juba.

Ahagana saa tanu, ni bwo abapolisi bo mu itsinda FPU-III-5 rigizwe n’umubare munini w’abapolisikazi ryahagurutse ku Kibuga cy’Indege Mpuzamahanga cya Kigali riyobowe na Senior Superintendent of Police (SSP) Speciose Dusabe, ryerekeza muri Sudani y’Epfo mu butumwa bw’Umuryango w’Abibumbye bwo kubungabunga amahoro.

Itsinda basimbuye ryagarutse i Kigali saa cyenda n’igice z’igicamunsi nyuma yo gusohoza inshingano zaryo mu gihe cy’umwaka.

Bakiriwe na Commissioner of Police (CP) Costa Habyara, Umuyobozi w’Ishami rya Polisi rishinzwe kurwanya iterabwoba, wabashimiye imyitwarire myiza yabaranze mu kuzuza inshingano zabo.