U Rwanda rwasangije ibindi bihugu ingamba rwafashe mu kurwanya ruswa

  • NTAWITONDA JEAN CLAUDE
  • Ugushyingo 2, 2022
  • Hashize umwaka 1
Image

Mu nama  mpuzamahanga iteraniye i Kigali, ihuje Komisiyo z’ Uburenganzira bwa Muntu z’ibihugu by’Afurika bihuriye mu Muryango w’Ibihugu bikoresha Igifaransa (OIF) n’izirwanya ruswa n’akarengane, u Rwanda rwagaragaje ingamba rwafashe mu kurwanya ruswa zirimo kwimakaza ikoranabuhanga mu mitangire ya serivisi. 

Muri iyi nama y’iminsi ibiri yatangiye uyu munsi ku wa 2 Ugushyingo 2022, Umunyamabanga wa Leta muri Minisiteri y’Ubutabera Amb. Nyirahabimana Solina ushinzwe ibyerekeye Itegeko Nshinga n’andi mategeko, yasobanuye ko  ikoranabuhanga rituma  serivisi zihuta zikagera ku bo zigenewe hatabayeho imiganirire y’abantu ari na yo ijya izana ibyuho bya ruswa.

Yagize ati: “Twebwe nk’Igihugu twakoze byinshi; ubu buryo bwo gukoresha ikoranabuhanga aho abantu bahabwa serivisi nyinshi; turebye mu byerekeranye no gutanga akazi, gutanga amasoko ya Leta, za cyamunara, serivisi zitangirwa ku Irembo,  byose usanga bikorwa mu ikoranabuhanga bikavanaho hahandi hajya habamo kuganira no kubivuga neza    kenshi bijya binatuma akazi gatinda, hajya hananyuzwamo na ruswa; umuntu akagutinza kenshi kugeza aho wibwiriza”.

Umunyamabanga wa Leta muri Minisiteri y’Ubutabera Amb. Nyirahabimana Solina (iburyo) na Elise Zahi wari uhagarariye OIF

Yongeyeho ko iri koranabuhanga ryageze no muri serivisi z’ubutabera nk’imwe mu nkingi zikomeye zo kurwanya ruswa.

Amb. Nyirahabimana yagaragaje ko hanashyizweho itegeko ryerekeye  kurwanya ruswa ndetse n’irirengera abatanze amakuru kuri ruswa mu rwego rwo gukangurira abaturage kutayihishira. Hanashyizweho inzego zinyuranye zifite mu nshingano kurwanya ruswa.

Muri ibi biganiro bigamije gusuzuma  uburyo ziriya Komisiyo zafatanya kurwanya ruswa, ndetse no kwigiranaho mu rwego rwo kwihutisha ingamba zo kuyirwanya, Mukasine Marie Claire  Perezida wa Komisiyo y’Igihugu y’Uburenganzira bwa Muntu (CNDP) mu Rwanda, yavuze  ko ruswa iri mu bituma uburenganzira bwa muntu bubangamirwa akaba ari yo mpamvu bakora inama nk’izi kugira ngo bazibe icyuho yinjiriramo, binyuze mu gusangira ubunararibonye.

 Yagize ati: “ Ruswa ifite ingaruka zikomeye ku burenganzira bwa muntu kuko uyitanze cyangwa uyihabwa abona ibyo atemerewe kubona kandi igakora no ku mutungo we, ushaka serivisi, ushaka isoko watanze ruswa ntabwo akora imirimo ikwiye nk’uko yagombaga kuyikora  ibyo bikagira ingaruka mu guhombya umutungo wa Leta, kandi uwo mutungo uturuka ku misoro y’abaturage. Ibyo byose ni ibintu bikora ku burenganzira bwa muntu”.

Yongeyeho ati: “Ni yo mpamvu tuba twakoze inama nk’izi ngizi kugira ngo turebe ahari  icyuho”.

Agaruka ku ngamba zafashwe n’u Rwanda mu kurwanya ruswa yavuze  ko ahakenewe kongerwa imbaraga ari mu kwigisha abantu kugira ngo bamenye uburenganzira bwabo.

Ati: “ …kuko hari abayitanga ariko baramutse bahagaze ku burenganzira bwabo ahubwo batanga amakuru aho kugira ngo batange ruswa. Twumva rero kuzamura imyumvire y’Abanyarwanda muri rusange bigishwa uburenganzira bwabo, bigishwa ko hari n’amategeko abarengera iyo batanze amakuru kuri ruswa, hakabaho urugamba rukomatanyije mu nzego zose ariko cyane umuturage akabigiramo uruhare rukomeye, tubona hari intambwe yagenda iterwa”.

Namizata Sangaré Perezida w’Ihuriro rya za Komisiyo z’Uburenganzira bwa Muntu mu bihugu bikoresha Igifaransa  akaba na Perezida w’Inama y’Igihugu  y’Uburenganzira bwa Muntu muri Côte d’Ivoire, yashimangiye ko guhura kw’izi komisiyo bigamije guhuza imbaraga no gusangira ubunararibonye mu kurwanya ruswa.

Namizata Sangaré Perezida w’Ihuriro rya za Komisiyo z’Uburenganzira bwa Muntu muri OIF

Yavuze ko n’ubwo ibihugu byashyizeho amategeko hagamijwe kurwanya ruswa, ariko by’umwihariko komisiyo zifite mu nshingano uburenganzira bwa muntu ari ngombwa ko zishyira hamwe kandi zigafatanya na za Guverinoma muri urwo rugamba kugira ngo uburenganzira bw’abaturage bwubahirizwe.

Namizata Sangaré yagarutse ku buryo ruswa ihungabanya uburenganzira bwa muntu muri Afurika mu nzego zitandukanye; mu buzima, mu burezi , mu miyoberere,…

Ati: “ Natanga urugero, niba hatowe ingengo y’imari yo kubaka amavuriro, ugasanga igiye ahandi birumvikana hamwe hagombaga kubakwa amavuriro ntaba acyubatswe, uburenganzira bw’ubuvuzi bw’abo baturage buba buburijwemo”.

Ku birebana n’ibyo igihugu cye cyasangiza ibindi, yavuze ko  ubu barimo gushyiraho komite zirwanya ruswa muri buri gihugu, aho ubu bo  bamaze kugira izigera kuri 30 kandi babona zitanga umusaruro.

Ati: “Nitubasha kugira izo komite zirwanya ruswa muri buri gihugu, zishyigikiwe na za Guverinoma  tuzaba tubashije kugera ku gikorwa gikomeye cyo kurwanya ruswa”.

Iyi nama yateranye mu rwego rw’Ihuriro rya za Komisiyo z’Uburenganzira bwa mu Muntu mu bihugu byo muri Afurika bigize umuryango wa OIF, yahuje ibihugu   birimo Benin, Cameroun, Mauritanie, Côte d’Ivoire n’u Rwanda.

  • NTAWITONDA JEAN CLAUDE
  • Ugushyingo 2, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE