U Rwanda rwakiriye imyitozo y’Ingabo za EAC ibaye ku nshuro ya 13

  • NTAWITONDA JEAN CLAUDE
  • Kamena 19, 2023
  • Hashize amezi 11
Image

Inzego z’umutekano z’Ibihugu bigize Umuryango w’Afurika y’Iburasirazuba (EAC) na bamwe mu basivili bakorana batangiye imyitozo ibahuza yitwa “Ushirikiano Imara” (CPX) ibaye ku nshuro ya 13. 

Iyi myitozo y’ibyumweru bibiri iri kubera mu Karere ka Musanze, yatangiye ku Cyumweru taliki 18 Kamena ikazasoza ku wa 30 Kamena 2023. 

Ni imyitozo ije ikurikira iyabereye muri Uganda mu mwaka ushize wa 2022, yari yitabiriwe n’ibihugu bitandatu muri birindwi bigize uyu Muryango. 

Kuri ubu hitabiriye abahagarariye ibihugu bitanu ari byo u Burundi, Kenya, Tanzania, Uganda n’u Rwanda rwayakiriye, bivuze ko ibihugu bigize uyu Muryango bitabonetse ari Repubulika Iharanira Demokarasi ya Congo (RDC) na Sudani y’Epfo. 

Abasirikare, abapolisi n’abasivili bitabiriye bararenga 600, aho biteganyijwe ko bazatahana ubuhanga n’ubumenyi mu gutegura no gukorera hamwe ibikorwa byo gucunga umutekano bihuriweho, kubahiriza amahame y’imikorere n’imikoranire byimakaza ukwihuza kwa EAC, kurushaho kumvikanisha gahunda z’uwo Muryango n’ibindi. 

Ubwo iyo myitozo yafungurwaga ku mugaragaro, Minisitiri w’Ingabo mu Rwanda Juvenal Marizamunda yavuze ko ingorane z’umutekano zigezweho muri iki gihe zigaragaza ko nta muntu cyangwa Igihugu gishobora gukora ukwacyo kidakeneye ibindi. 

Yagize ati: “Umutekano wa muntu ku Isi ya none urajegajega kandi biragoye kuwizera kubera imihindagurikire irangwa muri Politiki, ubukungu n’imibereho y’abaturage, ibyo bikaba bisaba guhuza imbaraga mu kwitegura guhangana n’izo mpungenge z’umutekano.”

Yakomeje ashimangira ko buri gihe haba hakenewe ubufatanye mpuzamahanga mu butabazi bwihuse ku mpinduka zitunguranye n’imiterere mishya y’ibikorwa byo kubungabunga amahoro, no gufasha abari mu kaga. 

Ubwo bufatanye na bwo bukeneye uburyo n’imikorere buhuriweho ku bihugu bigize Umuryango, aho abahurizwa mu butumwa bose baba bahujwe na gahunda ihamye y’imikorere kandi bakaba bumva kimwe iby’ingenzi bashyize imbere mu bikorwa byo gucunga umutekano no kubungabunga amahoro.

Iyo myitozo ibaye ku nshuro ya 13 irimo gukorwa ku nsanganyamatsiko igira iti: “Kwimakaza ukwihuza kw’Inzego z’umutekano za EAC no kubyaza umusaruro amahirwe y’amahoro n’umutekano bihoraho mu Karere.”

  • NTAWITONDA JEAN CLAUDE
  • Kamena 19, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE