U Rwanda rwagabanyije toni 126,000 z‘ibyuka bihumanya ikirere

  • NTAWITONDA JEAN CLAUDE
  • Ugushyingo 11, 2022
  • Hashize imyaka 2
Image

Mu myaka icyenda ishize, u Rwanda rwagabanyije nibura toni 126,000 z’ibyuka bihumanya ikirere kubera ishoramari ryongerewe mu mishinga yo guhangana n’imihindagurikire y’ikirere ndetse n’ibikorwa byo kurengera ibidukikije.

Iyi mibare yagaragajwe ku wa Gatatu ku Munsi wahariwe Imari, mu Nama Mpuzamahanga y’Umuryango w’Abibumbye yiga ku mihindagurikire y’Ikirere (COP27) izageza ku ya 18 Ugushyingo irimo kubera mu Misiri ahitwa Sharm El-Sheikh.

Ubuyobozi bw’Ikigega cy’Igihugu cy’Ibidukikije (FONERWA) ni bwo bwatangaje ayo makuru muri raporo yemeza ko guhera mu mwaka wa 2013 u Rwanda rwakusanyije inkungazingana na miliyoni 247 z’amadolari y’Amerika (amafaranga y’u Rwanda miliyari 258.2) yashowe mu mishinga y’ishoramari rifasha guhangana n’imihindagurikire y’ikirere.

Iyo nkunga bivugwa ko yashowe mu mishinga 46 itangiza ibidukikije mu bice bitandukanye by’Igihugu, akaba ari na yo yafashije mu kugabanya ibyuka bihumanya u Rwanda rwohereza mu Kirere.

Nibura hegitari 47,000 zateweho amashyamba ndetse n’ibiti bivangwa n’ubuhinzi, mu gihe hegitari 31,000 zizengurutse amazi n’imigezi zarinzwe ndetse ziranabungabungwa.

Nibura ingo 88,000 zahawe ingufu zitangiza ibidukikije mu gihe abantu 12,000 bafashijwe guhangana n’ingaruka z’imihindagurikire y’ikirere nk’uko byemezwa na raporo ya FONERWA.

Umunyamaabanga wa Leta muri Minisiteri y’Imari n’Igenamigambi (MINECOFIN) Claudine Uwera, yavuze ko u Rwanda rukeneye nibura miliyari 11 z’amadolari y’Amerika kugira ngo ruzabe rwamaze kubaka ubudahangarwa ku mihindagurikire y’ikirere bitarenze mu 2030.

Iyo nkunga izifashishwa mu kugabanya nibura toni miliyoni 4.6 z’ibyuka bihumanya ikirere, ariko kugeza ubu u Rwanda ntirurabona agera kuri kimwe cya gatatu cy’ubwo bushobozi bukenewe.

Yagize ati: “Inama ya COP27 ni amahirwe yo kuganira n’abafatanyabikorwa mu iterambere, kugira ngo badufashe kubona inkunga ya miliyari 6.5 z’amadolari y’Amerika yo kudufasha gukomeza kwihutisha urugendo rwo kugera ku ntego zo guhangana n’imihindagurikire y’ikirere.”

Minisitiri w’Ibidukikije Dr. Jeanne D’arc Mujawamariya, yasabye ibihugu bikize guhigura kuri miliyari 100 byiyemeje kugenera ibihugu bikennye bigirwaho n’ingaruka zikomeye z’imihindagurikire y’ikirere kubera inganda n’ibindi bikorwa by’iterambere ibyo bihugu bibyaza inyungu bishyira mu kaga ikirere gisangiwe n’Isi yose.

Iyo ntego ibihugu bikize ku Isi byayihaye  kuva mu 2009 mu gushyigikira ibikennye, ariko kugeza mu 2020 yari itaragerwaho.  

Ku munsi wahariwe Imari muri COP27, Abahagarariye za Guverinoma n’impirimbanyi mu kubungabunga ibidukikije basabye Isi yose gushakira hamwe ibisubizo byihuse kugira ngo hategurwe imari yunganira igenamigambi risanzwe rikorwa na za Leta.

Mu minsi ishize, Perezida Kagame yavuze ko ibyo kwibaza niba Afurika yiteguye gukoresha neza imari yagenerwa guhangana n’imihindagurikire y’ikirere bidakwiye kuba urwitwazo rw’abo bireba ngo bibabere urwaho rwo kutagira icyo bakora.

  • NTAWITONDA JEAN CLAUDE
  • Ugushyingo 11, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE