U Rwanda rushyigikiye ko Mushikiwabo akomeza kuyobora OIF

  • Imvaho Nshya
  • Nyakanga 28, 2022
  • Hashize imyaka 2
Image

Umunyamabanga Mukuru w’Umuryango w’Ibihugu bikoresha Igifaransa (OIF) Louise Mushikiwabo, yashishuye ko u Rwanda rwamaze gutanga kandidatire ye mu gushyigikira ko yakongera gutorerwa kuyobora uyu muryango muri manda ya kabiri y’imyaka ine.

Mushikiwabo yatangaje ayo makuru mu gihe manda ya mbere yayoboye izarangirana n’uyu mwaka, inama yitezwe kubera i Djerba muri Tunisia ku ya 19-20 Ugushyingo ikaba ari yo izanzura ugomba gukomeza kuyobora uyu muryango uhuza isi y’abavuga Igifaransa.

Mu ntangiriro z’iki cyumweru, ni bwo Mushikiwabo yemeje ko aziyamamariza gukomeza kuyobora OIF, ubwo hatangazwaga agace k’ikiganiro yagiranye na TV5 Monde.

Muri icyo kiganiro, Mushikiwabo yagize ati: ” Igihugu cyanjye cyatanze kandidatire, ndi umukandida ku musimbura wanjye. Narabyiyemeje ariko nanone ntabwo byoroshye kuko kuzana impinduka mu gihe nk’iki ukita ku hazaza ha Leta na Guverinoma 88 ntabwo ari ibintu byoroshye ariko biranejeje. Hari byinshi byo gukora kandi kugeza ubu hari imishinga minini itararangira kandi ni imishinga y’ingirakamaro cyane. Radio Jeunesse Nouvelle tugiye gutangiza mu mezi make ari imbere, Ikigega cya Francophonie, ni imwe mu mishinga myiza y’umuryango, birumvikana ishobora gukurikiranwa n’undi ariko ndahari kandi natanze kandidatire yanjye mbyishimiye.”

Uretse imishinga na gahunda nshya ziteganyijwe mu bihe biri imbere, hari izatatangiye gushyirwa mu bikorwa ku buyobozi bwa Louise Mushikiwabo. Imwe muri zo, ni gahunda igamije kuzamura ubukungu n’ubucuruzi hagati y’ibihugu biri OIF (Mission Economique et Commerciale de la Francophonie) nkuko Mushikiwabo yabisobanuye ubwo yari i Kigali yazanye n’abikorera baturutse mu bihugu bihuriye muri uyu muryango.

Icyo gihe yagize ati: “Abakoresha Igifaransa ku Isi ubu basaga miliyoni 320, 15% by’ishoramari ku Isi rituruka mu bihugu bya Francophonie binihariye 16% by’umusaruro mbumbe w’Isi. Ibyo si ibintu bito kuko ni isoko rifite uruhare runini ariko twe turi muri Francophonie y’ahazaza itari iy’inzego gusa n’ibiro bikuru i Paris, ni ugukora ku buryo Francophonie y’ahazaza iba iy’abaturage. Iyo ni yo mitekerereze dufite kuko biroroha iyo musangiye ururimi n’umuco, kuko si ururimi gusa ahubwo ni n’uburyo bw’imitekerereze n’imikorere.”

Taliki ya 23 Gicurasi 2022, Maroc yabaye igihugu cya mbere cyagaragaje ko cyifuza ko Louise Mushikiwabo yakomeza kuyobora Umuryango wa Francophonie, mu nama ya 41 y’Abaminisitiri bo mu bihugu bigize uyu Muryango.

, Minisitiri w’ububanyi n’amahanga wa Maroc, Nasser Bourita yatangaje ko igihugu cye gisanga Mushikiwabo akwiye kuba umukandida rukumbi ku mwanya w’Umunyabanga Mukuru wa Francophonie kuko bitanyuranyije n’amategeko ya Francophonie kandi biri mu nyungu za bose kuko hari imishinga y’ingirakamaro n’amavugurura y’ingenzi akomeje gukorwa azatanga umusaruro ufatika.

Louise Mushikiwabo yagizwe Umunyamabanga Mukuru wa OIF mu nama yabereye i Erevan muri Arménie taliki ya 12 Ukwakira 2018, akaba yari asimbuye Michaëlle Jean.

  • Imvaho Nshya
  • Nyakanga 28, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE