U Rwanda rurohereza itsinda rya 4 ry’abapolisi 180 muri MINUSCA

Kuri uyu wa Gatatu taliki ya 9 Ugushyingo ni bwo u Rwanda rwohereza itsinda FPU-3 rigizwe n’abapolisi 180 bagiye mu butumwa bw’Amahoro bw’Umuryango w’Abibumbye mu Gihugu cya Santarafurika (MINUSCA), ku nshuro ya mbere bakaba bagiye gukorera ahitwa Bangassou mu bilometero 727 uturutse mu murwa mukuru Bangui werekeza mu burasirazuba bw’Amajyepfo.

Ni itsinda rya kane ry’abapolisi b’u Rwanda rigiye koherezwa mu gihugu cya Santarafuria, kuko hari hasanzwe amatsinda atatu ari yo RWAFPU-1 na  RWAPSU akorera mu Murwa mukuru Bangui agizwe n’abapolisi 280, ndetse na RWAFPU-2 riherereye ahitwa Kaga Bandoro mu bilometero bigera kuri 300 uturutse Bangui.

Ku wa Kabiri, Umuyobozi Mukuru wungirije wa Polisi y’u Rwanda ushinzwe ibikorwa, DIGP Felix Namuhoranye, yahaye impanuro iryo tsinda ry’abapolisi ryitegura kujya mu butumwa bw’Umuryango w’Abibumbye muri Repubulika ya Santarafurika (MINUSCA).

DIGP Namuhoranye yasabye abagize iri tsinda ryoherejwe bwa mbere mu gace gashya kuzaba indashyikirwa mu kazi bahamagariwe gukora.

Yagize ati: “Abapolisi boherejwe mu butumwa mbere yanyu babaye intangarugero bagaragaza urwego ruhanitse rw’imikorere, murasabwa gukomerezaho mugahesha ishema u Rwanda nk’Igihugu muhagarariye.”

Yabashishikarije gukorana umurava inshingano zabo, bakirinda ibiganiro bitari ngombwa ahubwo bagaharanira guhangana n’inzitizi no gukemura ibibazo binyuze mu nzira ziboneye z’ubuyobozi.

Yabasabye kurangwa n’imyitwarire myiza no kubaha bigaragarira mu bikorwa bya buri wese no gukora kinyamwuga kuko ari byo bizabafasha gusohoza neza inshingano zabo.

Ati: “Ibendera ry’u Rwanda mu butumwa bw’Umuryango w’Abibumye bwo kubungabunga amahoro ryamaze kuzamurwa hejuru; kandi ibyo bijyana no kubahana, gukorera hamwe nk’ikipe, gufashanya, gukora ibyo mwatojwe kandi mwoherejwe gukora, kuba uri aho usabwa kuba kandi ku gihe nyacyo.”

Yabashishikarije gukora kinyamwuga mu gihe bari ku marondo yo gucunga umutekano (Patrol), akazi ko guherekeza abayobozi n’ibikoresho (Escort duties), kurinda abaturage b’abasivili n’indi mirimo bazaba bashinzwe.

Yabasabye kandi kuba umutwe wa Polisi wubahwa kandi ukundwa n’abo uhawe inshingano zo kurinda, ariko ugatinywa n’abafite imigambi mibi. Ati “Ibyo bizagendana n’uburyo mukora akazi kanyu, imyitwarire, imyambarire, no guhora muri maso.”