U Rwanda rurareshya ba mukerarugendo bitabiriye WTM i London

  • NTAWITONDA JEAN CLAUDE
  • Ugushyingo 8, 2022
  • Hashize umwaka 1
Image

U Bwongereza ni cyo gihugu kiza ku mwanya wa kabiri mu kwinijiriza u Rwanda mu rwego rw’ubukerarugendo nyuma ya Leta Zunze Ubumwe z’Amerika nk’uko byemezwa n’Urwego rw’u Rwanda rushinzwe Iterambere (RDB).

Ni muri urwo rwego, Itsinda ry’abakora mu rwego rw’ubukerarugendo mu Rwanda ririmo kubyaza umusaruro Imurikabikorwa ry’Isoko  Mpuzamahanga y’Ubukerarugendo (WTM) bashishikariza abanyamahanga gusura u Rwanda babaratira ibyiza birutatse.

Iryo murikabikorwa ry’ubukerarugendo riri kubera i London mu Bwongereza kuva ku wa Mbere taliki ya 7 rikazageza kuri uyu wa Gatatu taliki ya 9 Ugushyingo 2022, rikaba rihurije hamwe abasaga 50,000 bakora ubucuruzi butandukanye mu rwego rw’ubukerarugendo.

Ubuyobozi bwa RDB buravuga ko iryo tsinda rihagarariye u Rwanda rikomeje kurehereza abashyitsi kuza gusura iki gihugu cy’imisozi 1000 cyahogoje amahanga kubera ibyiza nyaburanga n’amahirwe y’ishoramari n’ubucuruzi butandukanye bisigira ugeze mu gihugu urwibutso rw’ibihe byose.

Abayobowe n’Umuyobozi ushinzwe Ubukerarugendo muri RDB Michaëlla Rugwizangoga, barimo abatwara n’abayobora ba mukerarugendo mu Gihugu, abakora mu rwego rw’amahoteli no kwakira abantu ndetse n’abandi babarizwa muri uru rwego.

Bakomeje gusangira ubunararibonye n’abanyamwuga baturutse mu Bwongereza no mu bindi bihugu bitandukanye, ndetse no kurushaho kuvumbura uburyo bushya  bwafasha ubukerarugendo bw’u Rwanda kurushaho gukundwa na benshi.

Umuyobozi w’ishami rishinzwe Ubukerarugendo muri RDB Michaella Rugwizangoga

Michaëlla Rugwizangoga yagize ati:”WTM y’I London ihurije abahagarariye ibigo by’ubukerarugendo bikomeye ku Isi kandi twishimiye cyane guha urubuga abakora mu rwego rw’ubukerarugendo mu Rwanda bagahura na bagenzi babo bakora ku rwego mpuzamahanga, bityo bakaba bashobora no gutangira umubano urambye mu by’ubucuruzi.

Yakomeje agira ati: “By’umwihariko twanejejwe no kubona abanyamwuga mu rwego rw’ubukerarugendo bishimira u Rwanda nk’icyerekezo ntagerereanywa cy’ubukerarugendo butangiza ibidukikije.”

Ibigo birimo kumurika ibikorwa ku cyanya cya Visit Rwanda harimo RwandAir, Primate Safaris, Wilderness Safaris, Thousand Hills Africa, International Tours and Travel, King’s Safaris, International Travel Agency, Kingfisher Journeys, Wildlife Tours Rwanda, G-step Tours, Hills in the Mist Tours, Earth Wanderer Ltd n’Ikigo Rwanda Eco Company and Safaris.

Mbere yo kwitabira iryo murikabikorwa, itsinda ryaserukiye u Rwanda ryabanje gukorera ibirori mu mihanda yo mu mijyi itatu y’u Bwongereza ari yo Manchester, Glasgow na London, ari na ho ryabashije gusobanura neza umwihariko w’u Rwanda, rihura n’abashoramari mu rwego rw’ubukerarugendo ndetse hakorwa n’ibiganiro.

Icyo gikorwa cyanyuze impande zombi kuko cyabayemo ukwisanzura no kugaragaza umuco nyarwanda binyuze mu mbyino gakondo zamuritswe n’abagize Umuryango Nyarwanda mu Bwongereza. Hagati ya Manchester na Glassgow, abaserukiye u Rwanda batemberaga muri Bisi itatse ibirango bya Visit Rwanda yakururiye benshi gushaka kumenya urw’imisozi 1000.

Mu cyiciro cya nyuma cy’ibirori byo ku muhanda, Rurangiranwa w’Ikipe y’Arsenal David Seaman n’umugore we Frankie baritabiriye maze ibintu birushaho kuryoha kuko bafashe umwanya wo gusubiza ibibazo bisekeje n’ibirebana n’urwibutso bakuye mu ruzinduko baheruka kugirira mu Rwanda muri Kamena uyu mwaka.

David Seaman yashimye u Rwanda n’icyerekezo gihebuje, ndetse yongeraho ko hari byinshi atasobanura abantu bakwibonera ari uko barusuye birenze kubona Ingagi, mu gihe umugore we Frankie yanyuzwe n’udushya tw’ikoranabuhanga yiboneye ko dukora neza mu Rwanda.

  • NTAWITONDA JEAN CLAUDE
  • Ugushyingo 8, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE