U Rwanda n’u Bufaransa mu kwagura ubutwererane mu bya gisirikare

Kuri uyu wa Gatanu, taliki ya 16 Nzeri, Minisitiri w’Ingabo Maj Gen Albert Murasira, yakiriye mu biro bye, Ambasaderi w’u Bufaransa mu Rwanda n’uhagarariye inyungu z’icyo gihugu mu bya gisirikare, Col Nicolas Dufour.

Ibiganiro bagiranye byibanze ku nzira zafasha kurushaho gushimangira ubutwererane bw’Ingabo z’u Rwanda n’iz’u Bufaransa.

Ibi biganiro bibaye nyuma y’iminsi mike abacamanza bakoraga iperereza ku ruhare rw’Ingabo z’u Bufaransa barihagaritse nyuma yo gusanga nta ruhare rutaziguye izo ngabo zaba zaragize muri Jenoside yakorewe Abatutsi byaba ari ibijyanye no kwanga gutabara Abatutsi bicwaga, gufata ku ngufu Abatutsikazi n’ibindi byaha bashinjwaga.

Abo Bacamanza basanze nta bimenyetso byajyanwa mu rukiko bigaragaza kwanga gutabara kw’ingabo z’u Bufaransa muri Jenoside yakorewe Abatutsi, no mu bindi byaha byibasiye inyoko muntu, by’umwihariko mu Bisesero, ahari icyiswe Opération Turquoise.