U Rwanda na Zambia mu gushyigikira FinTech muri Afurika

  • NTAWITONDA JEAN CLAUDE
  • Kamena 22, 2023
  • Hashize amezi 11
Image

Perezida wa Repubulika y’u Rwanda Paul Kagame na mugenzi we wa Zambia Hakainde Hichilema, biyemeje gushyigikira iterambere ry’ikoranabuhanga mu rwego rw’imari (FinTech) muri Afurika, basaba ko amahirwe ritanga yakwirakwizwa ku baturage benshi bashoboka.

Abakuru b’Ibihugu byombi babigarutseho ku wa Gatatu taliki ya 21 Kamena 2021, ubwo bayoboraga Ikiganiro cy’abayobozi gitangiza Inama ya 2023 yiga ku ikoranabuhanga ridaheza mu rwego rw’imari (Inclusive FinTech Forum 2023). 

Iyo nama ihurije hamwe abarenga 3000  baturutse mu bihugu bitandukanye, yateguwe na Guverinoma y’u Rwanda n’iya Singapore, binyuze mu Kigo Mpuzamahanga cya Kigali gishinzwe Ibikorwa by’Ubucuruzi n’Imari (KIFC) gifatanyije n’Ishami ry’Ikigo cy’Imari cya Singapore, Elevandi. 

Perezida Kagame yavuze ko iyo nama ari igihamya gifatika cy’umubano mwiza w’u Rwanda na Singapore, n’icy’uko hakenewe kwimakaza Ikoranabuhanga ridaheza mu rwego rw’imari kuko rigira uruhare rw’ingenzi mu kwihutisha iterambere ry’Afurika

Yagize ati: “Ubukungu bushingiye ku ikoranabuhanga si umukino uhombya bamwe ngo wungure abandi. Buri wese akwiye kubona inyungu zabwo. Ni yo mpamvu tugomba gukora byinshi biruseho kugira ngo n’abagore bagire uruhare mu ikoranabuhanga ry’urwego rw’imari. Imibare ntijya ibeshya, ibyo bishobora gutanga umusaruro mwiza ku bucuruzi bw’abagore, ku rwego ubwarwo ndetse n’ubukungu bwose muri rusange.”

Yakomeje avuga ko ubwiyongere bw’abaturage b’Afurika biganjemo urubyiruko, bukomeje gukurura ishoramari mu ikoranabuhanga ry’urwego rw’imari. 

Gusa ngo iyo ugereranyije n’uko bimeze ku  Isi, Afurika iracyari hasi mu kugira ibigo bikomeye by’ikoranabuhanga, nibura bifite ishoramari rya miliyari imwe y’amadolari y’Amerika, ndetse umubare munini w’ihererekanywa ry’amafaranga uracyakorwa mu ntoki (cash based). 

Yakomeje agira ati: “Mu gusigasira ibimaze kugerwaho, tugomba guharanira ubufatanye burushijeho gukomera no kubaka uruhererekane rwa FinTech rudaheza, rworoheye buri wese kurugeraho kandi ruramba.”

Ku rundi ruhande, Perezida Kagame yavuze ko hakiri ibyuho mu kubaka ibikorwa remezo by’ikoranabuhanga, ndetse na Politiki zigenga serivisi za FinTech zikaba zitarahuzwa kugira ngo umusaruro ukenewe muri Afurika uboneke. 

Gusa ngo u Rwanda rukomeje gushyira imbaraga mu kwigaragaza nk’icyitegererezo aho rwashyizeho Politiki n’amabwiriza bigenga iryo koranabuhanga ririmo n’irigezweho.

Mu rwego rwo gukwiza serivisi z’imari, Perezida Kagame yasabye Abanyafurika gukemura ikibazo cya internet inyaruka ikiri nkeya mu bihugu byinshi byo ku mugabane, kubika amakuru no kongera ubumenyi mu birebana n’imari.

Ati: “Twese dukwiriye gukuba kenshi intsinzi tugeraho muri uru rwego, kandi hari abantu benshi bashobora kungukira kuri iryo terambere .”

Imibare yerekana isura yagutse y’urwego rwa FinTech muri Afurika igaragaza ko telefoni zakwirakwiye ku kigero cya 80%, ariko ikwirakwizwa rya internet ryo rikaba rikiri kuri 47%.

Perezida wa Zambia Hakainde Hichilema, na we yavuze ko uretse ingorane z’ubumenyi budahagije, hakwiye no kwibandwa ku ngero zifatika z’uburyo FinTech yatangiye guhindura uburyo Abanyafurika bakoramo ubucuruzi. 

Ati: “Intego ikwiye kuba iyo guhanga amahirwe menshi ashoboka ku baturage bacu hatitawe ku bice baherereyemo, kugira ngo batange umusanzu wabo; bafate amahirwe azana no kuba mu ruhererekane rw’urwego rw’imari.”

Yongeyeho ko ari inshingano n’ukwiyemeza ahuriyeho na Perezida Kagame, gushyigikira urwego rw’imari, urubyiruko ruhanga udushya n’abandi bose bahurira mu ruhererekane rwa FinTech. 

Byitezwe ko muri iyo nama y’iminsi itatu yatangiye taliki ya 20 Kamena, abashoramari ku giti cyabo bahiga miliyari zisaga 3 z’amadolari y’Amerika agenewe ishoramari, mu gihe ibigo by’ishoramari bihiga miliyoni 500 z’amadolari y’Amerika yo gushyigikira ubufatanye bwa Leta n’abikorera. 

  • NTAWITONDA JEAN CLAUDE
  • Kamena 22, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE